पुलिसमाथि जावलाखेलको सहज जित

काठमाडौं। विभागीय टिम नेपाल पुलिस क्लबलाई राष्ट्रिय लिगमा जावलाखेल युथ क्लबले पराजित गरेको छ।

सातदोबाटोस्थिति एन्फा कम्प्लेक्समा सोमबार सम्पन्न खेलमा जावलाखेलले पुलिसलाई ३–० ले हराएको हो। लिगमा जावलाखेलको यो तेस्रो जित हो।

यो जितसँगै ६ खेल खेलेको जावलाखेलले ९ अंक जोडेर तालिकाको आठौं स्थानमा उक्लिएको छ। पुलिसको भने यो चौथो हार हो। समान खेलबाट पुलिसको ४ अंक छ।

जावलाखेलले खेलको १८औं मिनेटमा निकोलस ओडाने ह्यामिल्टनको गोलमा अग्रता लियो। त्यसको आठौं मिनेटपछि युवराज ढकालले गोल गर्दै जावलाखेलको अग्रता दोब्बर बनाए।

खेलको ४२ औं मिनेटमा पुलिसको सञ्जीव लामाको फ्रिकिकले लक्ष्य लिन सकेन। त्यस्तै, ७४ औं मिनेटमा जावलाखेलका अनिल रानामगरले पुलिसको धीरेन्द्रबहादुर शाहलाई पेनाल्टी बक्स भित्र लडाएपछि पुसिलले पेनाल्टी पाएको थियो।

तर, उक्त पेनाल्टीको पुलिसले सदुपयोग गर्न सकेन। पुलिसको कप्तान भारत शाहले प्रहार गरेको पेनाल्टी क्रसबार हुँदै बाहिरियो। ७८ औं मिनेटमा विकास दर्लामी मगरले उत्कृष्ट गोल गर्दै जावलाखेललाई ३-० को अवस्था पुराए।