पहिलो इनिङ्समा १८५ रनमै समेटियो एपीएफ

काठमाडौं। विभागीय डर्बीमा एपीएफ क्लब जय ट्रफीको पहिलो दिनको पहिलो इनिङ्समा १८५ रन बनाउँदै अलआउट भएको छ।

कीर्तिपुरस्थित त्रिवि क्रिकेट रंगशालामा टस जितेर नेपाल पुलिस क्लबले एपीएफलाई ब्याटिङको निम्तो दिएको थियो।

एपीएफ ६३.४ ओभरमा १८५ रनमा समेटियो। सुरुआत मध्यम रह्यो। आसिफ शेख १२ रनमा आउट भए। दीपक बोहोरा २८ रन बनाएर पभेलियन फर्किए। कप्तान रोहित पौडेलले आक्रामक ब्याटिङ गर्दै ४८ बलमा ४५ रन (९ चौका) जोडे पनि ठूलो इनिङ्स खेल्न सकेनन्।

सन्दीप जोरा १० रनमा आउट हुँदा एपीएफ दबाबमा परेको थियो। त्यसपछि सुमित महर्जनले १०० बलमा ५५ रन (५ चौका र ३ छक्का) बनाएर इनिङ्स सम्हाल्ने प्रयास गरे। तर, अन्य ब्याटरले लामो साथ दिन सकेनन्।

भुवन कार्की ४, लोकेश बम ४, अमर राउटेला ८, अभिषेश गौतम शून्य र युवराज खत्री १६ रनमा आउट भए। इर्शाद अहमद शून्य रनमा अविजित रहे।

पुलिसका ललित राजवंशी र सागर ढकालले उत्कृष्ट बलिङ गरे। ललितले ३१.४ ओभरमा ४ विकेट लिए भने सागरले २६ ओभरमा ४ विकेट झारे। कुशल भुर्तेलले २ विकेट लिए।