काठमाडौं । धनगडी प्रिमियर लिग डीपीएलको तेस्रो संस्करण भोली (सोमबार) सुरु हुदैछ । बर्षाका कारण दुई दिन पछाडी सरेको प्रतियोगितामा ६ टिमले आफुलाई अब्बल सावित गर्न कोशिश गर्नेछन् ।
राष्ट्रिय टिमका स्टार अनुहारले घरेलु क्रिकेटको रोमाञ्चकता र सोन्दर्यतालाई अझ बढी रंग भर्ने गरेका छन् । नेपालको पहिलो फ्रेन्चाई प्रतियोगिता डीपीएलको तेस्रो संस्करणमा राष्ट्रिय क्रिकेट टिमका खेलाडी पारस खड्का र सन्दिप लामिछाने देखिने छैनन् ।
पारसले पारिवारिक कारण देखाउँदै डीपीएलबाट नाम झिकेका हुन् । सन्दिप भने बिगबास खेल्न अष्ट्रेलियामा छन् ।
राष्ट्रिय टिमका खेलाडी डीपीएलको फ्रेन्चाईज टिमका रणनीतिक खेलाडी बनेका छन् । बाँकी खेलाडी भने महङ्गो रकममा टोलीमा अनुबन्धन भएका छन् ।
राष्ट्रिय क्रिकेट टिमका खेलाडीले डीपीएलमा कस्तो प्रर्दशन गर्लान, सबैको चासोको बिषय बनेको छ ।
सोमपाल कामी :
सोमपाल कामी नेपाल क्रिकेट टिमका भरपर्दा अलराउण्डर हुन् । उनी धनगढी प्रिमियर लिगको तेस्रो संस्करणमा धनगढी स्टार्सका रणनीतिक खेलाडी रहेका छन् । दुबै संस्करण उनको कप्तानीमा धनगढिलेनै जितेको थियो । दुई संस्करणमा उनले १३ खेलबाट १ सय ७९ रन बनाएका थिए । साथै १७ विकेट लगेका छन् । कामीले गत साता सकिएको युएई भ्रमणमा उत्कृष्ट प्रदर्शन गर्दै सिरिज जित्न महत्वपुर्ण भुमिका खेलेका थिए ।
पवन सर्राफ :
गत महिना सकिएको ईपीएलमा उत्कृष्ट अलराउण्ड प्रदर्शन गर्दै ललितपुर प्याट्रियट्सलाई बिजेता बनाउन ठुलो भूमिका खेलेका पवनले यसै महिना युएई भ्रमणमा राष्ट्रिय टोलीमा स्थान बनाउँदै डेब्यु गरे । उनले युएई सिरिजमा औसत खेल देखाए ।
उनी डीपीएलमा धनगढी स्टार्सका लागि खेल्नेछन् । राष्ट्रिय यु १९ टोलीमा राम्रो प्रदर्शन गरेका उनले डीपीएलमा १२ खेलमा ८४ रन बनाउँदै ६ विकेट मात्र लिन सफल छन् । उनलाई धनगढी स्टार्सले दुई लाख ५० हजारमा किनेको हो ।
दिपेन्द्र सिंह ऐरी :
दिपेन्द्र सिंह ऐरी नेपालका एक भरपर्दा ब्याट्सम्यान हुन् । डीपीएलमा उनी सिवाईसी अत्तरियाका रणनीतिक खेलाडी हुन । उनले १३ खेलमा १ सय ५९ रन तथा १० विकेट लिन सफल छन् । घरेलु प्रतियोगितामा एक्लै खेल जिताउन उनी माहिर मानिन्छन् ।
सन्दीप जोरा :
सन्दिपले युएई भ्रमणमा उत्कृष्ट प्रदर्शन गर्दै टी ट्वान्टी सिरिज जिताउन महत्वपुर्ण भुमिका खेलेका थिए । डेब्यु खेलमा अर्धशतक बनाउने कान्छो खेलाडीको कीर्तिमान उनले बनाएका थिए । युएई सिरिजमा सबैको आखाँमा परेका उनीले १७ बर्षको उमेर विश्व कीर्तिमान बनाउन सफल भए ।
डीपीएलमा सिवाईसी अत्तरियाले उनलाई दुई लाख ३० हजार मुल्यमा किनेको थियो । घरेलु तथा राष्ट्रिय यु १९ टोलीमा राम्रो प्रदर्शन गरेका उनले डीपीएलमा १२ खेलमा ७२ रन बनाउदै १ विकेट मात्र लिएका छन् । गत महिना सकिएको ईपीएलमा राम्रो प्रदर्शन गर्न सफल उनको टोली ललितपुर प्याट्रियट्सले उपाधि जितेको थियो ।
शरद भेषवाकर :
घरेलु प्रतियोगितामा निकै सफल कप्तान मानिने शरद महेन्द्रनगर युनाईटेडका रणनीतिक खेलाडी हुन् । उनको कप्तानीमा विराटनगर ईपीएलमा लगातर फाईनल पुगेको थियो ।
पहिलो संस्करणको पोखरा प्रिमियर लिग समेत उनको टोलीले जितेको थियो । डीपीएलमा महेन्द्रनगर युनाईटेडका कप्तान रहेका उनले ७ खेलमा १ सय ४७ रन बनाएका थिए । साथै उनको नाममा ६ विकेट रहेको छ ।
रोहित पौडेल :
युएई भ्रमणमा सचिन तेन्दुलकर र साहिद अफ्रिदिको रेकर्ड तोड्न सफल रोहित डीपीएलमा महेन्द्रनगर युनाईटेडबाट खेल्नेछन् । १७ बर्षे रोहित घरेलु प्रतियोगितामा आक्रमक ब्याटिङ गर्ने स्वभावले परिचित छन् ।
डीपीएलमा उनले १३ खेलमा ९८ रन बनाएका छन् । एक विकेट लिन समेत सफल छन् । केही महिना अगाडी सकिएको पोखरा प्रिमियर लिगको उपाधि जिताउन उनले ठुलो योगदान गरेका थिए । महेन्द्रनगरले उनलाई दुई लाख ३० हजार मुल्यमा किनेको हो ।
अभिनास बोहरा :
हालसालै सकिएको युएई भ्रमणमा उत्कृष्ट प्रदर्शन गर्दै टी ट्वान्टी सिरिज जिताउन महत्वपुर्ण भुमिका खेलेका अभिनासले ३ खेलमा ६ विकेट लिदै म्यान अफ द सिरिज घोषित भएका थिए ।
डीपीएलमा महेन्द्रनगर युनाईटेडका खेलाडी रहेका उनी ११ खेलमा ३० रन तथा ६ विकेट लिन सफल थिए । केहि समय अघि सकिएको ईपीएलमा पेस बलिङ गरेका अभिनास दोश्रो कम इकोनोमि बलर हुँदै राष्ट्रिय टिमको ढोका खोलेका थिए ।
करण केसी :
करण केसी नेपाली क्रिकेटका एक अर्को भरपर्दा अलराउण्डर हुन् । ईपीएलमा बिराटनगर वारियर्सबाट खेलेका उनले सुरुवाती दुई खेल जिताउन महत्वपुर्ण भुमिका खेलेका थिए । डीपीएलका दुई संस्करणमा उनले १३ खेलमा ८० रन तथा १ विकेट लिएका थिए ।
डिभिजन २ मा हातबाट गईसकेको खेलमा नेपाललाई फर्काउन र एकदिवसीय मान्यता दिलाउन उनले खेलेको निर्णायक ईनिङसलाई नेपाली क्रिकेटले सधै सम्झिरहनेछ । पहिलो संस्करणको पीपीएलमा उनी वेस्ट बलर घोषित भएका थिए ।
बिनोद भन्डारी :
सबैभन्दा महँगो खेलाडीको रुपमा बिनोद भन्डारीलाई रुपन्देही च्यालेन्जर्सले दुई लाख ५० हजारमा किनेको हो । डीपीएलमा उनले १३ खेलमा १ सय २१ रन प्रहार गर्न सफल छन् । युएई भ्रमणमा खासै जम्न नसकेका उनी महँगो खेलाडी भएका कारण बिनोदमाथि सबैको नजर छ ।
ज्ञानेन्द्र मल्ल :
राष्ट्रिय टोलीका उप कप्तान मल्ल काठमाडौ गोल्डेन्सका रणनीतिक खेलाडी हुन् । उनको कप्तानीमा ललितपुर प्याट्रियट्सले गत महिना सकिएको ईपीएलको उपाधि हात पारेको थियो ।
राष्ट्रिय टोलीबाट ओपनिङबाट खेल्ने उनी घरेलु क्रिकेटमा मध्यक्रममा ब्याटिङ गर्न आउछन् । उनले डीपीएलका १३ खेलमा तीन सय ९ रन बनाउन सफल छन् ।
ललित नारायण राजवंशी :
राष्ट्रिय टोलीका नियमित सदस्य ललित काठमाडौ गोल्डेन्सका धारिला हतियार हुन् । उनले ज्ञानेन्द्र मल्ल कप्तानीमा ललितपुर प्याट्रियट्सबाट गत महिना सकिएको ईपीएलमा उपाधि हात पर्न ठुलो भुमिका खेलेका थिए ।
बायाँ हाते स्पिनर उनी राष्ट्रिय टोलीका सदस्य बसन्त रेग्मीको स्थानमा खेल्ने गर्छन् । हालसम्म डीपीएलमा उनले १६ खेलमा ७ रन बनाउँदै १६ विकेट लिएका छन् । सबैभन्दा उच्च रकम खर्चेर गोल्डेन्सले उनलाई दुई लाख ५० हजारमा किनेको हो ।
प्रदिप ऐरी :
प्रदिपलाई दुई लाख चालिस हजारमा रुपन्देही च्यालेन्जर्सले खेलाडी लिलामीमा हात पार्न सफल भयो । युएई भ्रमणमा खासै राम्रो प्रदर्शन नसकेका उनले डीपीएलका दुई संस्करणमा ११ खेलबाट दुई सय चालिस रन बनाएका छन् । साथै उनी ३ विकेट लिन सफल छन् । राष्ट्रिय टोलीका उनी बैकल्पिक विकेटकिपर हुन् ।
भिम सार्की :
भिमलाई दुई लाख पचास हजारमा रुपन्देही च्यालेन्जर्सले टोलीमा भित्राउन सफल भयो । युएई भ्रमणमा उनले डेब्यु गर्ने मौका भने पाएनन् । हालसम्म उनले डीपीएलमा ६ खेलमा मात्र दस रन बनाउन सकेका छन् । पीपीएलको पहिलो संस्करणमा भने उनले बुटवल ब्लास्टर्सबाट निकै उत्कृष्ट ब्याटिङ गरेका थिए ।
बसन्त रेग्मी :
टी ट्वान्टीमा नेपालका लागि सर्बाधिक विकेट लिने खेलाडी बसन्त रुपन्देही च्यालेन्जर्सका रणनीतिक खेलाडी हुन् । हालसम्म उनले डीपीएलमा ११ खेलबाट ८२ रन लिएका छन । उनको नाममा १० विकेट समेत छ । पछिल्लो समय लयमा देखिन संघर्षरत उनी घरेलु क्रिकेटका अनुभवी बलर हुन् ।
मोहमद आरिफ शेख :
आरिफलाई सर्वाधिक दुई लाख पचास हजारमा महेन्द्रनगर युनाईटेडले टोलीमा भित्राएको थियो । युनाईटेडका लागि उनि निकै भरपर्दा अलराउण्डर हुन् । हालसम्म उनले डीपीएलमा १५ खेलबाट दुई सय ७० रन तथा ११ विकेट लिन सफल छन् ।
हालसालै सकिएको युएई भ्रमणमा तीन खेल खेल्दै उनले औसत प्रदर्शन गरेका थिए । यु १९ राष्ट्रिय टोलीबाट आएका उनी सिनियर टिमका सम्भावना बोकेका खेलाडी हुन् ।
