काठमाडौं। युवा तथा खेलकुद मन्त्रालय र नेपाल ओलम्पिक कमिटी (एनओसी)बीच पुन: विवाद उत्पन्न भएको छ।
२०औं एसियन गेम्सका लागि नेपालबाट खेल दर्ता गराउने विषयमा विवाद उत्पन्न भएको हो।
एनओसीले मंगलबार पत्रकार सम्मेलन गर्दै अर्को वर्ष जापानमा हुने गेम्सका लागि ३० खेल दर्ता गराएको जानकारी दिएको थियो। तर, मन्त्रालयले भने मंगलबार नै ३१ खेल दर्ता गरेको जानकारी दिएको हो।
मन्त्रालयले पठाएको विज्ञप्तिमा अवैध एनओसीको अनुरोधलाई मान्यता दिन नसक्ने भएपछि गेम्समा सहभागी हुन चाहने ३१ वटा खेल संघको सूची दर्ता गरिसकेको जानकारी दिएको हो।
‘तोकिएकै मितिमै दर्ता गरी नियमअनुसार सम्बन्धी निकायले प्रक्रिया अगाडि बढाइरहेको अवस्थामा यस विषयमा अतिरन्जित ढंगबाट प्रचार गरेर मन्त्रालय र परिषद्को साख गिराउने काम भएकाले त्यस्ता गतल प्रचारको पछि नलाग्न सम्बन्धित सबैमा आग्रह गरिन्छ,’ मन्त्रालयले भनेको छ।
एसियन गेम्सका लागि जुन ३० सम्म खेल नाम दर्ता गर्ने मिति समयसीमा तोकिएको थियो। उक्त समयसीमा भित्रै नाम दर्ता गर्नका लागि पत्र पठाएकोले एनओसीका अध्यक्ष जीवनराम श्रेष्ठले जानकारी दिए ।
एनओसीले पठाएको सूचीमा तेक्वान्दो र फुटबल भने समावेश छैनन्।
