राखेपको रिक्त बोर्ड सदस्य नियुक्तिको तयारी

काठमाडौं । युवा तथा खेलकुद मन्त्री बब्लु गुप्ताले राष्ट्रिय खेलकुद परिषद्को रिक्त बोर्ड सदस्य नियुक्तिको अन्तिम तयारी गरेका छन् ।

तत्कालिन माओवादी केन्द्रबाट बोर्ड सदस्यमा नियुक्त गरिएको ६ जनाको कार्यकाल गत हप्ता सकिएसँगै मन्त्री गुप्ता नयाँ बोर्ड सदस्य नियुक्तिको तयारीलाई अन्तिम चरणमा पुर्याएका हुन् ।

तत्कालिन माओवादी केन्द्रबाट बोर्ड सदस्य बनेका अन्जन धमला, विना श्रेष्ठ, दिपेन्द्र विष्ट, जनक बर्तौैला, मोहम्मद फाजिल र प्रकाशकुमार कुसारीको चार वर्षको कार्यकाल गत मंसिर ८ गते सकिएको थियो ।

राखेपको नयाँ बोर्ड सदस्यका लागि मन्त्री सहित सचिवालयले आन्तरिक गृहकार्यलाई अन्तिम चरणमा पुर्याएको छ । मन्त्री गुप्ताले नयाँ बोर्ड सदस्य नियुक्तिमा जेनजी आन्दोलनबाट प्रतिनिधित्व गराउने भएका छन् । रिक्त ६ बोर्ड सदस्यमा तीन जना जेनजी आन्दोलन र अन्य तीन खेल क्षेत्रका विज्ञलाई नियुक्त गर्ने तयारी छ ।

जेनजी आन्दोलनमा घाईते भएका फुटबलर पवन शाही बोर्ड सदस्य बन्ने पक्का पक्की जस्तै छ । अन्य सहीद परिवार र जेनजी मुभमेन्टबाट आएका युवालाई बोर्ड सदस्य बनाउने तयारी छ । अन्य तीन जनामा एक जना अन्तराष्ट्रिय फुटबल खेलाडी सहित प्रशिक्षकलाई समेत ल्याउने तयारी भैरहेको मन्त्री गुप्ताको सचिवालयले जनाएको छ ।

मन्त्री गुप्ताले कुनैपनि राजनीतिक दलमा आबद्ध नभएका ब्यक्तिलाई बोर्ड सदस्यहरु नियुक्तिको पहिलो मापदण्डमा राखेका छन् ।

‘रिक्त ६ जना बोर्ड सदस्यमा लगभग सहमती जुटाएका छौं । केही समयमा मनोनयनको औपचारिक प्रकृया सक्नेछौं । मनोनयन गरिने सदस्यहरुको नाममा मोटामोटी टुङ्गो लागेको छ ।’ मन्त्रीको सचिवालयका एक सदस्यले खेलपाटीसँग भने ।