सय दिनमा सम्भव छ दशौं राष्ट्रिय खेलकुद ?

काठमाडौं । खेलकुदमन्त्री बब्लु गुप्ताले राष्ट्रिय खेलकुद परिषद्को बोर्ड बैठक बोलाएका छन्। मुख्य अजेन्डा छ, दशौं राष्ट्रिय खेलकुद ।

राजनीतिक दाउपेचका कारण गत वर्ष हुनुपर्ने दशौं राष्ट्रिय खेलकुद आयोजना भएन । नयाँ मन्त्री आउनेबित्तिकै दशौं राष्ट्रिय खेलकुदलाई पहिलो प्राथमिकतामा राखेको देखिन्छ ।

करिब ५ महिनाको समय लिएर खेलकुद मन्त्रालयमा आएका नयाँ खेलकुद मन्त्रीले दशौं राष्ट्रिय खेलकुद आयोजना गर्न सक्लान् त ?

खेलकुद बुझेका धेरैले भन्छन्, असम्भव ।

तर, जेन जी आन्दोलबाट उदाएका मन्त्रीको गति भने बेग्लै छ । ‘दुई दिनमा राज्य सत्ता ढाल्न सक्नेले एक सय दिनमा दशौं राष्ट्रिय खेलकुद किन गर्न नसक्ने ?’ खेलकुदमन्त्रीको सचिवालय यसै भन्छ ।

दशौं राष्ट्रिय खेलकुदका लागि कर्णाली प्रदेशमा पूर्वाधार निर्माणको नेतृत्व गरेका कर्णाली प्रदेश खेलकुद परिषद्का निवर्तमान सदस्यसचिव विश्वमित्र सञ्जेलसमेत सरकारले चाहेको खण्डमा दशौं राष्ट्रिय खेलकुद एक समय दिनमा सम्भव रहेको बताउँछन् ।

यसका लागि उनले पाँच सुझाव दिएका छन् ।

१. सातै प्रदेश सरकार र प्रदेश खेलकुद परिषद्लाई विश्वासमा लिनपर्यो । तयारीको छलफल गर्न पर्यो । आयोजक प्रदेशको समस्या हल गरेर अघि बढ्न पर्यो ।

२. खेल संघसँग तयारी र संवाद गर्न पर्यो । खेल संघहरुभित्र द्धन्द र विवाद छ । प्रतियोगिताको खेलहरु त खेल संघले सञ्चालन गर्ने हो । खेल संघभित्रको समस्या हल गर्न पर्यो ।

३. प्रशासनिक आइपर्ने कानुनी बाधा अड्चन फुकाउन पर्यो । सार्वजनीक खरिद ऐनसँग बाँझिने कुरा सरकारले हल गर्ने प्रतिबद्धता चाहियो । बाधा अड्चन मन्त्रीपरिषद्बाट निर्णय गराएर समाधान गर्न सकिन्छ ।

४. समस्या भनेको खरिदको प्रकृयाले लिने समय हो । सरकारले हल गर्दिन पर्यो । सरकार साथमा छ भनेर प्रधानमन्त्री र अर्थमन्त्रीले काम गरेपछि खास समस्या रहदैन ।

५. प्रतियोगिता आयोजनामा समस्यालाई बल्झाएर हैन, हल गर्ने विधिबाट अघि बढ्न पर्यो । दशौंको बजेट चौमासिक तालिकामा छ भनेर समस्या खडा गरिएको छ । यस्ता विषयलाई समझदारीका आधारमा समाधान गर्न पर्यो ।