नयाँ यात्रा, पुरानो चुनौती

काठमाडौं। चार महिनापछि नेपाल एकदिवसीय क्रिकेटमा फर्किँदै छ। दुबई अन्तर्राष्ट्रिय मैदानबाट पुन: सुरु हुन लागेको विश्वकप लिग–२ मा यसपल्ट प्रतिस्पर्धी छन्, अमेरिका र घरेलु टोली संयुक्त अरब इमिरेट्स (यूएई)। लक्ष्य भने नेपाली टोलीको उही पुनरागमन रहने छ।

टी–२० विश्वकप एसिया छनोट जितेर आगामी वर्ष भारत र श्रीलंकामा हुने प्रतियोगितामा आफ्नो स्थान सुरक्षित गरेको नेपाल अहिले नयाँ परीक्षाको मैदानमा उभिएको छ। छोटो फर्म्याटमा चम्किएको टोलीलाई अब लामो फर्म्याटमा निरन्तरता देखाउनुपर्ने चुनौती थपिएको छ।

विश्वकप लिग–२ तीन वर्षको यात्रा हो। तर, नेपालले जारी प्रतियोगितामा अझै स्थायित्व पाउन सकेको छैन। १६ खेल सकिँदा ५ जित मात्रै हात पारेको नेपाल सातौं स्थानमा छ। त्यसैले यो प्रतियोगितामा अवसर बाँकी रहे पनि नेपाललाई अब गल्ती गर्ने ठाउँ भने रहने छैन।

अमेरिका भने २० खेलमा २८ अंकका साथ उच्च मनोबलमा छ। लगभग आधा खेल खेलिसक्दा अमेरिकाले १४ जितसहित २८ अंक जोडिसकेको छ। यो टोली लगातार ६ खेलमा अपराजित छ।

तर, पछिल्ला खेलमा अमेरिकाले नेपाली चुनौतीलाई दबाउँदै आएको छ। गत वर्ष भएका दुवै खेलमा अमेरिकाले नेपालाई तीन विकेट र ३७ रनले पराजित गरेको थियो। हालसम्म भएका ९ मध्ये ४ खेल नेपालले जित्दा एक खेल ‘टाई’ भएको छ। दुबईमा यसपल्ट भेटिँदा नेपालले पुरानो समीकरण उल्ट्याउने लक्ष्य राख्नेछ।

यस्तै, यूएई भने ६ अंकसहित तालिकाको पुछारमा छ। पछिल्लोपल्ट स्कटल्यान्डलाई ९७ रनले पराजित गरेको यस टोलीले पछिल्ला दुई खेलमा नेदरल्यान्ड्ससँग पाँच र स्कटल्यान्डसँग आठ विकेटको हार बेहोरेको थियो। त्यसैले यूएई पनि नेपालजस्तो पुनरागमन गर्ने लक्ष्यका साथ मैदान उत्रिने पक्का छ।

तर, यस टोलीले पछिल्लो समय नेपालविरुद्ध ३१ महिनादेखि कुनै जित हात पार्न सकेको छैन। अन्तिमपल्ट २ मार्च २०२३ मा घरेलु मैदानमा भएको शृंखलामा यूएईले नेपाललाई ६८ रनले पराजित गरेको थियो।

त्यसयता भएका पाँच खेलमा नेपाल अपराजित छ। ओमानमै भएको विश्वकप छनोटमा समेत एक रनले पराजित गरेको कारण नेपाल केही माथि देखिन्छ।

यूएई र ओमानमा महिनौं लामो तयारीपछि नेपाली टोलीमा आत्मविश्वास बढेको देख्न सकिन्छ। विश्वकप छनोटमा अपराजित रहँदै उपाधि जितेको उर्जालाई आधार बनाएर टिमले यूएईको भूमिमा बलिङ र फिल्डिङमा निरन्तर सुधार गरेको छ।

सन्दीप लामिछानेको जादु, दीपेन्द्रसिंह ऐरीको सर्वगुण सम्पन्न प्रदर्शन र गुल्सन झाले निर्णायक क्षणमा दिने योगदानले टोलीलाई बलियो बनाएको छ।

ओपनर कुशल भुर्तेलले आक्रामक सुरुआत दिने जिम्मा सम्हालेका छन्। कप्तान रोहित पौडेलबाट स्थायित्वको अपेक्षा बढेको छ भने कुशल मल्लले लय फिर्ता ल्याउनुपर्ने आवश्यकता छ।