लक्ष्मी पूजाको दिनमा त्रिवि मैदानमा फ्लडलाइटले झिलिमिली

काठमाडौं। त्रिवि क्रिकेट मैदानका चारवटा फ्लडलाइटको लाइट टेस्टिङ गरिएको छ।

विशन–ईश्वरी जेभीले आइतबार एक दिनमै दुईवटा पोल उठाएका थिए। योसँगै ६ वटै पोल ठड्याउने काम सम्पन्न भएको थियो। लगत्तै सोमबार लक्ष्मी पूजाको दिन पारेर लाइट टेस्टिङ गरिएको हो।

आयोजना प्रमुख चक्रवर्ती कण्ठका अनुसार रंगशालामा ४५ मिटर तथा ६० मिटर अग्ला ६ वटा ३०/३० टनका हाइमास्ट लाइट जडान गरिएको छ।

मैदानको पारापिट बनाउन बीकेओआई–केसीडीसी–बीजी जेभी र फ्लडलाइट जडानका लागि विशन–ईश्वरी जेभीले १९ र २२ फागुन २०८१ मा शहरी विकास मन्त्रालय मातहतको संघीय सचिवालय निर्माण तथा व्यवस्थापन कार्यालय सानो गौचरनसँग सम्झौता गरेका थिए। 

पारापिट बनाउन ४९ करोड २५ लाख रुपैयाँ र फ्लडलाइट जडानका लागि ४७ करोड ३७ लाख रुपैयाँमा सम्झौता भएको थियो।