त्रिविमा ठडियो फ्लडलाइटका ६ वटै टावर

काठमाडौं। त्रिवि क्रिकेट मैदानका फ्लडलाइटका ६ वटै टावर ठड्याइएको छ।

विशन–ईश्वरी जेभीले आइतबार एक दिनमै दुईवटा पोल उठाएका हुन्। योसँगै ६ वटै पोल ठड्याउने काम सम्पन्न भएको हो। आयोजना प्रमुख चक्रवर्ती कण्ठका अनुसार रंगशालामा ४५ मिटर तथा ६० मिटर अग्ला ६ वटा ३०/३० टनका हाइमास्ट लाइट जडान गरिएको छ।

पोल नं १, ४, ५ र ६ मा फ्लडलाइट आंशिक रूपमा जडान भइसकेको छ। बाँकी दुई वटामा अब लाइट राख्ने काम सुरु हुनेछ। मैदानको पारापिट बनाउन बीकेओआई–केसीडीसी–बीजी जेभी र फ्लडलाइट जडानका लागि विशन–ईश्वरी जेभीले १९ र २२ फागुन २०८१ मा शहरी विकास मन्त्रालय मातहतको संघीय सचिवालय निर्माण तथा व्यवस्थापन कार्यालय सानो गौचरनसँग सम्झौता गरेका थिए। 

पारापिट बनाउन ४९ करोड २५ लाख रुपैयाँ र फ्लडलाइट जडानका लागि ४७ करोड ३७ लाख रुपैयाँमा सम्झौता भएको थियो। बीकेओआई–केसीडीसी–बीजी जेभीले ६० दिनभित्र पारापिटको काम सक्ने गरी २० फागुन २०८१ बाट काम थालेको थियो। तर, तीन सिफ्ट काम गर्दा पनि नसकिएपछि ३० असारसम्म समय थप गरिएको हो। उक्त समयसीमामा पनि काम नसकेपछि कम्पनीलाई दैनिक दुई लाख रुपैयाँभन्दा बढी जरिवाना गराएर काम गराइएको थियो। पारापिटको काम भने सकिसकेको छ।