४ खेलमै हम्जाको २ गोल

काठमाडौं। अन्तिम सिट्टी बज्न केही सेकेन्ड मात्र बाँकी थियो। नेशनल स्टेडियममा समर्थकहरू खुशीले उफ्रिरहेका थिए। किनभने बंगलादेशले नाटकीय रूपमा बराबरी गोल गर्दै खेलमा फर्किएको थियो। तर, त्यो खुशी धेरै बेर टिकेन।

अतिरिक्त समयको अन्तिम क्षणमा फेरि गोल खाँदा बंगलादेश ४–३ ले हङकङसँग पराजित भयो। एएफसी एसियन कप छनोटको तेस्रो चरणमा समूह ‘सी’ को रोमाञ्चक खेलमा बंगलादेशका लागि हम्जा देवान चौधरी, शमित सोम र शेख मोर्सालिनले गोल गरे।

हङकङका लागि राफाएल मेरकिसले ह्याट्रिक गरे भने अर्को गोल एभर्टन कामार्गोले गरे। १३औं मिनेटमै बंगलादेशले अग्रता लिएको थियो। डी बक्सको बाहिरबाट हम्जाको उत्कृष्ट फ्रिकिक गोलकिपरले रोक्न सकेनन्।

त्यो क्षणमा स्टेडियम उत्साहले भरिएको थियो। लिस्टर सिटीका खेलाडी हम्जाले राष्ट्रिय जर्सीमा खेल्दै गरेको चौथो खेलमै दोस्रो गोल गरे। तर, पहिलो हाफको अतिरिक्त समयको अन्त्यमा गल्तीले त्यो खुशी हरायो।

हङकङको कर्नरबाट आएको बल फयरसल अहमद फाहीमले क्लियर गर्न खोज्दा उल्टो हेडर गरे, जसले एभर्टन कामार्गोलाई खुला मौका दियो। उनले बराबरी गोल गरे।

दोस्रो हाफमा सुरुआतमै अर्को गल्ती भयो। कप्तान सोहेल रनाको कमजोर ब्याकपासलाई राफाएल मेरकिसले सदुपयोग गर्दै हङकङलाई अग्रता दिलाए। त्यसपछि कोच काब्रेराले ५६औं मिनेटमा शमित सोम, जमाल भुइयाँ र फाह्मेदुल इस्लामलाई मैदानमा पठाए।

त्यसपछि बंगलादेशको आक्रमण केही धारिलो भयो, तर फिनिशिङ कमजोर रह्यो। उल्टै ७४औं मिनेटमा एभर्टनको पासबाट मेरकिसले आफ्नो दोस्रो गोल गर्दै हङकङलाई ३–१ को अग्रता दिलाए।

७७औं मिनेटमा डेब्यू गर्दै विदेशी खेलाडी जायान अहमद मैदानमा पसेपछि बंगलादेशले बायाँ विङबाट राम्रा अवसरहरू बनायो। अन्ततः ८४औं मिनेटमा मोर्सालिनले गोल गर्दै खेलमा आशा जगाए।

जमालको फ्रिकिकपछि हङकङ गोलकिपरको गल्तीमा बल बक्सभित्र आयो, जसलाई मोर्सालिनले नेटमा पठाए। ९ मिनेटको इन्जुरी टाइममा बंगलादेशले लगातार आक्रमण गर्‍यो।

८९औं मिनेटसम्म खेल ३–२ मै थियो। त्यसपछि मर्सालिनको क्रसमा डिफेन्डरको टच लागेर बल गोलमुखमा पुगेको थियो, जसलाई शमित सोमले हेड गर्दै गोल गरे र ३–३ बराबरी गरे।

तर त्यो खुशी स्थायी हुन सकेन। अन्तिम सिट्टी बज्नुअघि नै हङकङका मेरकिसले बक्सभित्रबाट शक्तिशाली प्रहार गर्दै ह्याट्रिक पूरा गरे र टोलीलाई ४–३ को जित दिलाए।

तीन खेलपछि बंगलादेशले जम्मा १ अंक मात्र जोडेको छ र समूह ‘सी’ को तल्लो स्थानमा छ। हङकङ ७ अंकसहित शीर्षमा पुगेको छ। सिङ्गापुर ५ अंकसहित दोस्रो र भारत २ अंकसहित तेस्रो स्थानमा छन्।

यस हारसँगै हम्जा र उनका टोलीका लागि एसियन कपको मुख्य चरणमा पुग्ने सम्भावना अत्यन्त कमजोर बनेको छ।