पाकिस्तान एक खेलअगाबै सेमिफाइनलमा

काठमाडौं। माल्दिभ्समाथि सानदार जित निकाल्दै पाकिस्तान एक खेलअगाबै साफ यु–१७ च्याम्पियनसिपको सेमिफाइनलमा प्रवेश गरेको छ।

कोलम्बो रेसकोर्स स्टेडियममा शुक्रबार सम्पन्न खेलमा पाकिस्तानले माल्दिभ्सलाई ५–२ ले पराजित गरेको हो। लगातार दोस्रो जितसहित पाकिस्तान समूह बी बाट अन्तिम चारमा प्रवेश गरेको हो।

पहिलो खेलमा पाकिस्तानले भुटानलाई ४–० ले पराजित गरेको थियो। माल्दिभ्सले भने भारतसँग ६–० को फराकिलो हार बेहोरेको थियो। भारत पनि दोस्रो खेलमा भुटानलाई १–० ले पाखा लगाउँदै अन्तिम चारमा प्रवेश गरिसकेको छ।

जितविहीन भुटान भने समूह चरणबाटै बाहिरिएको छ। अब सेप्टेम्बर २२ मा भारत र पाकिस्तान भिड्नेछन्। उक्त खेलले समूह बी को विजेता टुंगो लगाउने छ।

सोही दिन भुटान र माल्दिभ्स सान्त्वना जितको खोजिमा हुनेछन्।