काठमाडौं। आठौं बीआइबी अन्तरविद्यालय बास्केटबल प्रतियोगिताको फाइनलमा सोमबार आयोजक बौद्ध इन्टरनेसनल स्कुललाई पराजित गर्दै मातृभूमि स्कुल च्याम्पियन भएको छ।
अत्तरखेल, गोकर्णेश्वरमा आयोजित प्रतियोगिताको फाइनलमा मातृभूमिले प्रभावशाली प्रदर्शन गर्यो। उसले घरेलु टिमको चुनौती ५०–३३ ले ब्वाइजतर्फको उपाधि कब्जा गरेको हो। गर्ल्सतर्फ चाँदबाग स्कुलले काष्ठमण्डप विद्यालयलाई २१–८ ले हराएर उपाधि जित्यो।
गर्ल्सतर्फ चाँदबागकी सौर्या बाराकोटी र ब्वाइजतर्फ मातृभूमिका आभाष राउत मोस्ट भ्याल्युएबल प्लेयर (एमभीपी) घोषित भए। गर्ल्समा काष्ठमण्डपकी वाणिरा अधिकारी र ब्वाइजमा बौद्धका आयुष लामाले हाईएस्ट स्कोररको अवार्ड हात पारे। मेरिडियन इन्टरनेसनल स्कुलले फेयर–प्ले अवार्ड प्राप्त गर्यो।
राष्ट्रिय खेलकुद परिषदका सदस्यसचिव टंकलाल घिसिङ, गोकर्णेश्वर नगरपालिकाका प्रमुख दीपककुमार रिसाल, बौद्ध इन्टरनेसनल स्कुलका प्रिन्सिपल हरि लामाले विजेता खेलाडी तथा टिमलाई ट्रफी, मेडल तथा प्रमाणपत्र प्रदान गरे। लिगकम नकआउटको आधारमा सञ्चालित प्रतियोगितामा ब्वाइजतर्फ २१ र गर्ल्समा १६ टिमले प्रतिस्पर्धा गरेका थिए
