नेपालको सजिलो विपक्षी भुटान

काठमाडौं। बंगलादेशको राजधानी ढाकामा दुईपटकको फराकिलो जित तथा मिना देउवा र पूर्णिमा राईको ह्याट्रिक। नतिजाको हिसाबले हेर्दा भुटान नेपालका लागि सजिलो विपक्षी हो। 

एएफसी यु–२० महिला एसियन कप छनोटको सुरुआतमै नेपाल बुधबार भुटानसँग भिड्दैछ। यो टोलीसँग नेपालले कहिल्यै हार्नुपरेको छैन। तर, यो तथ्यसँगै अब थिम्पुको वातावरण जोडिन थालेको छ।

जताततैबाट दबाब थपिएको छ। नेपाली टोलीका कप्तान बिर्सना चौधरी यसबारे आफैं सतर्क छिन्। उनले घरेलु टोली भुटानलाई हल्का रूपमा नलिन आग्रह गर्दै भनेकी छन्,‘भुटान मात्रै होइन, सबै टिम टप छन्। तर, हाम्रो तयारी पनि राम्रो छ।’

गत वर्षको डिसेम्बरमा त्रिपुरेश्वरको दशरथ रंगशालामा भएको एक मैत्रीपूर्ण खेल भुटानका लागि ऐतिहासिक बन्यो। नेपाली टिमसँग १–१ को बराबरीमा रोकिँदा उमेर समूहको फुटबल इतिहासमै त्यो भुटानको पहिलो बराबरी नतिजा थियो। त्यही आत्मबल लिएर अब भुटान फेरि आफ्नो घरेलु मैदानमा ओर्लिँदैछ। योपटक एएफसी जस्तो ठूला प्रतियोगिताको छनोट छ। त्यसैले उसलाई पनि नतिजा दोहोर्‍याउने दबाब हुनेछ।

भुटानले यसैको तयारी स्वरूप घरेलु लिग खेल्ने आरटिसी महिला टिमसँग अभ्यास खेल खेलेको थियो। त्यसलाई उसले ‘फाइनल ट्युन–अप’ को रूपमा लिएको छ। टोलीमा केही सिनियर अनुभवी खेलाडी पनि थपिएका छन्, जसले घरेलु मैदानको आत्मविश्वाससँगै नेपालको अघिल्लो जितको बदला लिने मानसिकता बनाएको देखिन्छ।

नेपालका लागि भने यो खेल अघिल्ला सफलताहरूको निरन्तरता हो। ढाकामा उसले भुटानमाथि ६–१ र ८–० को जित निकालेको थियो। ती दुई जितमा मीना र पूर्णिमाले ह्याट्रिक गरेका थिए। ती दुवै खेलाडी अहिलेको टोलीमा पनि छन्। भुटानको कमजोर रक्षापंक्तिविरुद्ध उनीहरू फेरि निर्णायक साबित हुनसक्छन्।

तर, थिम्पुको चिसो मौसम, उचाइ र घरेलु समर्थको दबाब नेपाली टोलीका लागि सहज रहँदैन। अघिल्ला अनुभवहरूले नेपाली खेलाडीहरूलाई त्यसबारे चेतावनी दिइसकेको छ।

मुख्य प्रशिक्षक यामप्रसाद गुरुङ यस्तो अवस्थामा खेलाडीलाई सान्त्वना दिँदै वातावरण केही सहज बनाउन खोजिरहेका छन्।भन्छन्,‘हाम्रो लक्ष्य एसियन कप खेल्ने छ। तर, तीनवटै टिमलाई उत्तिकै सम्मान छ। भुटान अर्काको देश होइन, आफ्नै जस्तो लागिरहेको छ।’

कप्तान बिर्सनाले पनि यही रणनीतिमा विश्वास राखेकी छन्। एसियन कपको ढोका खोल्ने यो छनोट चरण नेपालको हालसम्मकै तयारीपूर्ण यु–२० टिमका लागि निर्णायक मोड साबित हुनसक्छ।

अब प्रश्न एउटै छ– इतिहास दोहोरिन्छ कि थिम्पुले फेरि अचम्मको नतिजा देखाउँछ? त्यो हेर्न भने अन्तिम ‘ह्विसर’सम्म कुर्नैपर्ला।