नेपालसँग खेल्नुअघि परिपक्क तयारी गर्दै भुटान

काठमाडौं। एएफसी यु–२० महिला एसियन कप छनोटको गन्ति सुरु भइसकेको छ। 

योसँगै समूह ‘बी’ को आयोजक भुटानको यु–२० महिला टिमले अन्तिम तयारी तीव्र बनाएको छ। आगामी अगस्ट ६ मा नेपालसँगको खेल्नुअघि भुटान घरेलु मैदान थिम्पुमा मैत्रीपूर्ण खेलमार्फत आफ्ना रणनीति परीक्षण गर्दैछ। 

उसले आरटिसी महिला टिमविरुद्ध प्रतिस्पर्धा गरेको हो। यो क्लबले भुटानी महिला लिग खेल्दै आएको छ। यो मैत्रीपूर्ण खेललाई भुटानले ‘फाइनल ट्युन–अप’को रूपमा लिएको छ, जसबाट टोलीको आत्मविश्वास बढाउने र घरेलु परिस्थितिमा सहज बनाउने अपेक्षा गरिएको छ। 

अघिल्लो महिना मात्रै नेपालले भुटानलाई साफ महिला यु–२० च्याम्पियनसिपमा ६–१ र ८–० ले पराजित गरेको थियो। ती दुई खेलले नेपाली यु–२० टिमको आक्रामक क्षमता र भुटानी टिमको कमजोरी स्पष्ट देखाएका थिए। 

तर, गत डिसेम्बरमा त्रिपुरेश्वरस्थित दशरथ रंगशालामा भएको मैत्रीपूर्ण खेलमा भुटानले नेपाललाई ऐतिहासिक रूपमा १–१ को बराबरीमा रोकेको थियो। त्यो खेल उमेर समूह फुटबलमा भुटानको पहिलो बराबरी नतिजा थियो। यसले थिम्पुमा नेपाली टोलीलाई अकल्पनीय दबाबमा राख्न सक्ने आकलन गरिएको छ।

भुटान फेरि एकपटक घरेलु मैदानमा नेपालविरुद्ध उत्रिँदैछ। तर, यसपटक यो टोली साफको फराकिलो हारको बदला लिन मैदानमा ओर्लने मनस्थितिमा देखिन्छ।

नेपालका लागि भने यो खेल आफ्नो अघिल्लो प्रदर्शनको निरन्तरता दिने अवसर हो। थिम्पु जानुअघि कप्तान बिर्सना चौधरीले भुटान र साउदी अरबलाई फराकिलोअन्तरले पराजित गर्दै उत्तर कोरियासँग बराबरी खेलेर एसियन कपमा पुग्ने लक्ष्य रहेको सुनाएकी थिइन्।

मुख्य प्रशिक्षक यामप्रसाद गुरुङले पनि सोही लक्ष्य सुनाएका थिए। उनले भनेका थिए, ‘दुई टोलीलाई हराएर उत्तर कोरियाविरुद्ध ड्र गर्ने रणनीतिमा छौं।’

थिम्पुको चिसो मौसम र उचाइमा हुने प्रभावले पनि खेलको लयमा असर पुर्‍याउन सक्छ, जुन कुरा नेपालले अघिल्लो भेटमा अनुभूत गरिसकेको छ। 

भुटानले त्यही भौगोलिक फाइदालाई हतियार बनाउन खोजिरहेको देखिन्छ।