काठमाडौं। अर्जेन्टिनाका सुपरस्टार लिओनल मेसीलाई प्रतिबन्धको खतरा बढेको छ। बिहीबार बिहान अष्टिनमा सम्पन्न एमएलएस अल–स्टार खेलमा मेसी अन्तिम समयमा अनुपस्थित भएका थिए।
इन्टर मियामीका कप्तानसमेत रहेका मेसी र जोर्डी आल्बा दुवै जना खेलमा सुरुआतबाटै मैदान उत्रने तयारीमा थिए। तर, खेलको केही घन्टाअघि मात्रै इन्टर मियामीले एमएलएसलाई मेसी र आल्बा दुवै नखेल्ने जानकारी दिएको हो।
एमएलएसको नियमअनुसार अल-स्टार खेलका लागि छनोट भएका खेलाडीहरू खेलमा उपस्थित हुनैपर्ने हुन्छ। तर, घाइते भएका खेलाडीको हकमा भने यो लागु हुँदैन।
यसअनुसार मेसी र आल्बालाई एक खेलको प्रतिबन्ध लाग्न सक्ने चर्चा चलेको छ। यस्तो भएमा यस सप्ताहन्त हुने इन्टर मियामी र एफसी सिनसिनाटीबीचको खेल यी दुई खेलाडीले गुमाउने छन्।
सन् २०२३ मा एमएलएसमा भित्रिएका मेसीले त्यसयता लिगमा व्यापक प्रभाव पारिरहेका छन्। २०२२ को विश्वकप जिताएपछि आएका उनी अहिले लिगको सबैभन्दा ठूलो अनुहार हुन्।
उनको आगमनसँगै एमएलएसको अन्तर्राष्ट्रिय लोकप्रियता बढेको छ भने टिकट बिक्रीमा पनि अभूतपूर्व रूपमा वृद्धि भएको छ।
