लुसी भन्छिन्– खेलसँगै महिला खेलाडीमाथि जातीय दुर्व्यवहार बढ्यो

काठमाडौं। इङ्ग्ल्यान्डकी डिफेन्डर लुसी ब्रोनजले महिला फुटबलको लोकप्रियता बढेसँगै खेलाडीहरूमाथि जातीय दुर्व्यवहार पनि बढेको बताएकी छन्।

उनका अनुसार खेल ठूलो हुँदै जाँदा दर्शक संख्या र ध्यानको केन्द्र बढ्नुका साथै आलोचकहरूको संख्या पनि बढ्दो छ।

युरो २०२५ अन्तर्गत बिहीबार स्विडेनविरुद्धको क्वाटरफाइनल खेलमा इङ्ग्ल्यान्डको जितमा महत्त्वपूर्ण भूमिका खेलेकी ब्रोनजले उक्त विषयमा एक भावुक पत्रकार सम्मेलन गरिन्। सो क्रममा उनको सहखेलाडी जेस कार्टर प्रतियोगिता सुरु भएदेखि जातीय दुर्व्यवहारको सिकार बनिरहनुपरेको खुलासा गरेकी थिइन्। कार्टर कालो वर्णकी खेलाडी हुन्।

‘खेल ठूलो हुँदै जानु राम्रो हो, दर्शक बढ्नु राम्रो हो। तर, आलोचक पनि बढ्छन्। हामी आलोचना स्वीकार गर्छौं। किनकि हामी खेललाई माया गर्छौं। तर, दुर्व्यवहार स्वीकार गर्दैनौं,’ ब्रोनजले भनिन्।

उनले थपिन्,‘महिला फुटबलमा विशेष गरी अनलाइन दुर्व्यवहार डरलाग्दो रूपमा बढिरहेको देखिन्छ। पुरुष फुटबलमा यो बढी रंगशालामा देखिन्छ। तर, महिला फुटबलमा सामाजिक सञ्जालमा निशाना बनाउने प्रवृत्ति बढेको छ।

उनले समाधान अवश्य रहेको बताइन्। तर, आफूसँग यसको ठ्याक्कै उत्तर नभएको स्वीकार गरिन्। पत्रकारहरूले सोधेको एउटा प्रश्नमा ब्रोनजले भनिन्,‘जेस कार्टरमाथिको दुर्व्यवहारले अन्य युवा काला खेलाडीहरू इङ्ग्ल्यान्डबाट खेल्ने कि नखेल्ने भन्ने कुरामा दोधारमा पार्छ कि भन्ने चिन्ता हुनु स्वाभाविक हो। तर, हामीले हाम्रो टिममा यस्तो व्यवहारको कुनै स्थान छैन भन्ने स्पष्ट सन्देश दिइरहेका छौं। हामी परिवर्तनको पक्षमा छौं। फुटबल मात्र होइन, सम्पूर्ण समाजमा।’

उनले थपिन्,‘हामी यस्तो वातावरण बनाइरहेका छौं जहाँ सबै पृष्ठभूमिबाट आएका खेलाडीहरूले आफूलाई अभिव्यक्त गर्न सकून् र राष्ट्रिय टिमबाट प्रतिनिधित्व गर्न सकून्।’

अब इङ्ग्ल्यान्डले सेमिफाइनल खेलमा आउँदो मंगलबार जेनिभामा इटालीसँग प्रतिस्पर्धा गर्नेछ।