बार्सिलोना सर्दै रासफोर्ड

काठमाडौं। इङ्लिस क्लब म्यानचेस्टर युनाइटेडका आउट अफ फेवर खेलाडी मार्कस रासफोर्ड बार्सिलोनातर्फ सर्नेनजिक पुगेको खबर बाहिरिएको छ।

२७ वर्षीय रासफोर्डले आफ्नो बाल्यकालको क्लब युनाइटेडका लागि पछिल्लो पटक डिसेम्बर १२ मा खेलेका थिए। त्यसपछि उनी फेब्रुअरीको सुरुआतमा एस्टन भिल्लामा लोनमा गएका थिए।

स्पेनिस च्याम्पियन बार्सिलोना उनको प्राथमिक गन्तव्य रहँदै आएको बताइएको छ। विशेषगरी युनाइटेडका नयाँ मुख्य प्रशिक्षक रुबेन आमोरिमले उनलाई टिमबाट बाहिर राखेका छन्।

ब्रिटेनको प्रेस एसोसिएसनले दिएको जानकारी अनुसार बार्सिलोना र रासफोर्डबीच सिजनभरको लोन डिलको विषयमा वार्ता अगाडि बढिरहेको छ। त्यसमा भविष्यमा स्थायी रूपमा अनुबन्ध गर्ने विकल्प पनि राखिएको छ।

रासफोर्ड यस्ता पाँच खेलाडीमध्ये एक हुन् जसले युनाइटेडलाई क्लब छाड्ने चाहना व्यक्त गरिसकेका छन्। क्लबको एकेडेमी हुँदै पहिलो टिममा आएका रासफोर्डले युनाइटेडका लागि ४२६ खेलमा १३८ गोल गरेका छन्।

इङ्ल्यान्डका अन्तर्राष्ट्रिय खेलाडी रासफोर्डले डिसेम्बरमै नयाँ चुनौतीका लागि तयार"रहेको बताएका थिए। उनले गत महिनामात्रै बार्सिलोनाका युवा प्रतिभा लामिन यामालसँग खेल्न चाहेको खुलासा गरेका थिए।

रासफोर्ड प्रि–सिजनदेखि नै आमोरिमको पहिलो टोलीबाट टाढै छन्। बार्सिलोनाका स्पोर्टिङ डाइरेक्टर डेकोले मे महिनामा रासफोर्ड मनपर्ने बताएका थिए। मुख्य प्रशिक्षक हान्सी फ्लिकले उनलाई सानदार खेलाडी भनेर तारिफ गरेका थिए।

अहिले रासफोर्डले युनाइटेडको पहिलो टोलीको जर्सी नम्बरसमेत गुमाइसकेका छन्। ब्राजिलका फरवार्ड माथेउस कुञ्हाले उनको नम्बर १० जर्सी लिएका छन्। उनी हालैका ट्रान्सफरमा लेफ्ट डिफेन्डर डिएगो लिओनसँगै क्लबमा आएका थिए।

युनाइटेडले ब्रेन्टफोर्डसँग ६५ मिलियन (८७ मिलियन अमेरिकी डलर) मा सहमति जनाएसँगै ब्रेन्टफोर्डका फरवार्ड ब्रायन म्बेउमो पनि टोलीमा आउने अपेक्षा गरिएको छ। तर, थप खेलाडी अनुबन्ध गर्न युनाइटेडले खेलाडी बेचेर बजेट व्यवस्थापन गर्नुपर्नेछ।

रासफोर्ड प्रारम्भमा लोनमा गए पनि उनको तलबको भार घट्दा क्लबलाई ठूलो राहत हुने अपेक्षा गरिएको छ। यता, बार्सिलोनाले स्पेनका विङ्गर निको विलियम्सलाई अनुबन्ध गर्ने तयारी गरिरहेको थियो। तरऽ उनले हालै एथ्लेटिक बिलबाओसँग १० वर्षको नयाँ सम्झौता गरेका छन्।

फ्लिकको पहिलो सिजनमै बार्सिलोनाले लिग र कोपाको उपाधि जितेको थियो।