गोल संख्यामा रोनाल्डोलाई पछि पार्दै मेसीको नयाँ कीर्तिमान

काठमाडौं। अर्जेन्टिनी फरवार्ड लिओनल मेसीले क्रिस्टियानो रोनाल्डोलाई पेनाल्टीबाहेकका गोल संख्यामा पछि पार्दै नयाँ कीर्तिमान बनाएका छन्। उनले रोनाल्डोभन्दा १६७ खेल कम खेलेर यो उपलब्धि हासिल गरेका हुन्।

शनिबार भएको मेजर लिग सकर (एमएलएस) अन्तर्गत न्यूयोर्क रेड बुल्सविरुद्धको खेलमा इन्टर मियामीका लागि मेसीले दुई गोल र दुई असिस्ट गरे। उनको उत्कृष्ट प्रदर्शनको मद्दतले इन्टर मियामीले १–० ले पछि परेको खेल ५–१ ले जित्यो।

यो दुई गोलसँगै मेसीको पेनाल्टीबाहेक कुल गोल संख्या एक हजार ११४ खेलमा ७६४ पुगेको छ। अर्कोतर्फ पाँच पटक बालोन डी’ओर जितेका र हाल साउदी प्रो लिगको अल–नसरका लागि खेलिरहेका पोर्चुगिज स्ट्राइकर रोनाल्डोले एक हजार २८१ खेलमा पेनाल्टीबाहेक ७६३ गोल गरेका छन्।

हाल इन्टर मियामीका कप्तान रहेका मेसीले पछिल्ला सात खेलमध्ये छैटौं पटक दुई गोल गरेका हुन्। उनी यस सिजनको एमएलएस गोल स्कोरर सूचीमा १८ गोलसहित शीर्ष स्थानमा छन्।