काठमाडौं। जर्मनीकी गोलकिपर एन–क्याट्रिन बेर्गरले अविश्वसनीय प्रदर्शन गर्दै टोलीलाई युइएफए महिला युरोपियन च्याम्पियनसिप २०२५ को सेमिफाइनलमा पुर्याएकी छन्।
उनले फ्रान्सविरुद्धको क्वाटरफाइनलमा दुई पेनाल्टी बचाइन्। एउटा सफल पेनाल्टी प्रहार पनि गरिन् र ‘टुर्नामेन्टको सबैभन्दा ठूलो बचाउ’ समेत गरिन्।
जर्मनी एक खेलाडीले कम भइसकेको अवस्थामा र एक गोलले पछि परेको अवस्थाबाट फर्कँदै फ्रान्ससँगको खेल १–१ मा बराबरीमा ल्यायो। त्यसपछि पेनाल्टी सुटआउटमा ६–५ को रोमाञ्चक जित दर्ता गर्यो।
३४ वर्षीया गोथम एफसीकी किपरले १० मध्ये ९ शट बचाइन्। विशेषगरी अतिरिक्त समयमा कप्तान यानिना मिङ्गेले गल्ती गर्दै फर्किएर हेडर गरेको बललाई बेर्गरले एक हातले गोललाइनबाट चमत्कारी रूपमा बचाइन्, जुन प्रतियोगिताकै उत्कृष्ट बचाउ मानिएको छ।
पेनाल्टी सुटआउटमा पनि बेर्गर चम्किइन्। उनले पहिलो पेनाल्टी (एमेल माज्रीको) रोकिन् र अन्तिममा एलिस सोमबाथको पेनाल्टी बायाँतर्फ डाइभ गर्दै बचाइन्। त्यसले जर्मनीको ६–५ को जित सुनिश्चित गर्यो र जुरिचमा स्पेनसँग सेमिफाइनल खेल्ने स्थान दिलायो।
बेर्गरलाई खेलको ‘प्लेयर अफ द म्याच’ घोषित गरियो। तर, उनले भने आफ्नो प्रदर्शनको श्रेय टोलीलाई दिइन्। उनले भनिन्, ‘म खुसी थिइनँ कि खेल पेनाल्टीमा गयो… तर मैले मेरो भूमिका निभाएँ। १२० मिनेटसम्म टोलीले अद्भुत मेहनत गर्यो, श्रेय मलाई होइन टोलीलाई जानुपर्छ।’
बेर्गर युरो २०२२ को जर्मनी टोलीकी सदस्य थिइन्, जुन इङ्ल्यान्डसँग फाइनलमा पराजित भएको थियो। त्यतिबेला उनी बेञ्चमा थिइन्।
पछि उनले त्यो प्रतियोगिताको दौरान दोस्रो पटक थाइराइड क्यान्सर भएको खुलासा गरेकी थिइन्। अहिले उनी क्यान्सरलाई फेरि जितेर फर्किएकी हुन्। घाँटीमा ‘अल विइ ह्याब इज नाउ’ लेखिएको ट्याटु छ, जसले घाउ छोपेको छ।
उनले भनिन्,‘२०२२ गइसक्यो। त्यसैले अब म भविष्यतर्फ हेर्छु। अहिले म जीवनको सबैभन्दा राम्रो समय बिताइरहेकी छु। म सेमिफाइनलमा पुगेकी छु। त्यसैले गर्व महसुस गरिरहेकी छु।’
-1752983218.webp)
-1752983802.webp)
