वेस्ट ह्यामबाट खेलेकी भारतीय गोलकिपरले लिइन् सन्न्यास

काठमाडौं। युरोपमा व्यावसायिक फुटबल खेल्ने पहिलो भारतीय महिला खेलाडीको पहिचान बनाएकी अदिति चौहानले १७ वर्ष लामो करियरपछि खेलबाट सन्न्यासको घोषणा गरेकी छन्। 

३२ वर्षीया पूर्व भारतीय राष्ट्रिय टोलीकी गोलकिपर अदितिले अब मैदान बाहिर रहेर नयाँ पुस्ता ल्याउन योगदान दिने बताएकी छन्। ‘१७ अविस्मरणीय वर्षपछि म गौरवका साथ व्यावसायिक फुटबलबाट सन्न्यास लिँदैछु,’ उनले बिहीबार सामाजिक सञ्जालमा लेखेकी छन्।

दिल्लीबाट आफ्नो सपना पछ्याउँदै बेलायतसम्म पुगेकी अदिति वेस्ट ह्याम युनाइटेड क्लबबाट खेलेकी थिइन्। उनले स्पोर्ट्स म्यानेजमेन्टमा मास्टर्स अध्ययन गरेकी छन्। उनले लेखेकी छन्, ‘यो यात्रामा मैले शिक्षा र फुटबलबीच कहिल्यै एक रोजाइ परेन। मैले दुवैका लागि लडेँ र त्यही सन्तुलनले मलाई परिभाषित गर्‍यो।’

अदितिले भारतीय राष्ट्रिय टोलीका लागि ५७ खेल खेलेकी छन्। सन् २०१२, २०१६ र २०१९ मा भारतले जितेको साफ महिला च्याम्पियनसिपमा उनी टोलीको हिस्सा थिइन्। 

उनले दुई सिजन वेस्ट ह्याममा बिताएपछि भारत फर्किएर गोकुलम केरला एफसीबाट खेलिन्। सन् २०१९-२० र २०२१-२२ मा उनले क्लबलाई भारतीय महिला लिग (आइडब्युएल) उपाधि जिताउन महत्त्वपूर्ण भूमिका खेलेकी थिइन्। 

त्यस्तै, एएफसी महिला क्लब च्याम्पियनसिपमा सेमिफाइनल पुगेको र तेस्रो स्थान हासिल गरेको टोलीको समेत हिस्सा थिइन्। अदिति आफ्नो अन्तिम सिजनमा नवप्रवेशी श्रीभूमि एफसीको प्रमुख खेलाडी बनेर क्लबलाई आइडब्युएलमा तेस्रो स्थानमा पुर्‍याउन सफल भइन्।

सन्न्यासपछि पनि उनले फुटबललाई केही दिन बाँकी रहेको बताउँदै भनिन्, ‘अब म पिचबाहिर बसेर नयाँ पुस्ताका लागि बाटो निर्माण गर्ने जिम्मेवारीमा लाग्नेछु। फुटबलले मलाई दिएको सबै कुरा अब म फिर्ता दिनेछु।’