काठमाडौं। श्रीलंकासँगको दोहोरो भिडन्तले नेपाललाई साफ यू-२० महिला च्याम्पियनसिपको उपाधि होडमा निर्णायक मोडमा ल्याएको छ।
ढाकाको बसुन्धरा स्पोर्ट्स ग्राउन्डमा बिहीबार हुने खेल नेपालका लागि जितमात्र होइन, गोलअन्तरमा सुधार ल्याउने अवसर पनि हुनेछ।
तीन खेलपछि समान ९ अंकसँगै बंगलादेश शीर्ष स्थानमा छ। नेपाल समान खेलबाट ६ अंक बटुल्दै बंगलादेशलाई पछ्याइरहेको छ। नेपालले उपाधि यात्रालाई जीवन्त राख्न फेरि श्रीलंकामाथि गोल वर्षाउनुपर्छ।
मंगलबारको ७–० को एकतर्फी जितबाट हौसिएको नेपाली टोलीले आजको खेलमा त्यसलाई दोहोर्याउने लक्ष्य राखेको छ।
तर, यो सहज हुनेछ भन्ने ग्यारेन्टी छैन। एकातिर नेपालका लागि अर्को गोल वर्षा अनिवार्य जस्तै छ भने अर्कातिर श्रीलंकाको लक्ष्य भने प्रतियोगितामा आत्मसम्मानसहितको पुनरागमन हुनेछ। लगातार तीन खेल गुमाइसकेको श्रीलंकाका लागि आजको खेल ‘गर या मर’ जस्तै भएको छ।
नेपाली प्रशिक्षक टोलीलाई थाहा छ उपाधि अब अंकसँगै बढी गोलमा पनि निर्भर हुनेछ। किनभने शीर्षस्थानमा पुग्न नेपालले बंगलादेशलाई नतिजा र गोल दुवैमा उछिन्नै पर्छ। त्यसैले आजको खेललाई नेपालले आक्रामक फुटबलमार्फत दबाब सिर्जना गर्ने अवसरका रूपमा पनि हेरिरहेको छ।
अर्को मैदानमा आजै भुटान र बंगलादेश आमनेसामने हुनेछन्। त्यो खेलको नतिजाले पनि नेपालको यात्रा कुन दिशातिर मोडिन्छ भन्ने संकेत दिनेछ। तर, त्यतिबेला पुग्दा नेपालले श्रीलंकासँगको आफ्नो काम पहिले सशक्त ढंगले सकिसकेको हुनुपर्छ।
आजको खेल लिग तालिकाको अंक मात्र होइन, गोलअन्तरको जटिल गणित, मानसिक दबाब र रणनीतिक परीक्षा पनि हो। नेपाल त्यसका लागि तयार देखिएको छ। ।
-1752754328.jpeg)
