सेप्टेम्बरमा खुल्दै विश्वकपको टिकट बिक्री

काठमाडौं। फुटबलको सर्वोच्च निकाय फिफाले विश्वकप २०२६ को पहिलो चरणको टिकटका आवेदन सेप्टेम्बर १०, २०२५ देखि खुलाउने भएको छ।

इच्छुक दर्शकहरूले अहिले नै [FIFA.com/tickets](https://www.fifa.com/tickets) मा गएर आफ्नो फिफा आइडि बनाउने र टिकट किन्ने प्रक्रियामा सहभागिता जनाउने तयारी गर्न सक्नेछन्।

विश्वकप २०२६ को उद्घाटन खेल जुन ११ मा मेक्सिको सिटीमा हुनेछ। फाइनल खेल जुलाई १९ मा न्यूयोर्क/न्यु जर्सीमा हुनेछ। यी सहरले हालै क्लब विश्वकपको फाइनल सफलतापूर्वक आयोजना गरेको थियो।

यो ऐतिहासिक प्रतियोगितामा ४८ टोलीहरूले १०४ खेल खेल्नेछन्। यी खेल ६.५ मिलियन दर्शकले मैदानबाटै हेर्ने अपेक्षा गरिएको छ। त्यसैले फिफाले सबैलाई अहिले नै योजना बनाउन र आफ्नो स्थान सुरक्षित गर्ने सुझाव दिएको छ।

टिकट अत्यधिक माग हुने अनुमान भएकाले विभिन्न चरणहरूमा बिक्री गरिनेछ। पहिलो चरणको आवेदन सेप्टेम्बर १० बाट खुल्ने छ। जसका लागि फिफाको वेबसाइटमा गएर आइडी बनाउनु पर्नेछ। एकपटक आइडी बनिसकेपछि दर्शक विभिन्न चरणमा आवेदन दिन योग्य हुनेछन्।

टिकट बिक्रीका हरेक चरणमा भुक्तानीको माध्यम, खरिद प्रक्रिया र उपलब्ध प्याकेजहरू फरक हुन सक्छन्। विस्तृत जानकारी क्रमशः सार्वजनिक गरिने फिफाले जनाएको छ।