गोलकिपर सुजता बेञ्चमा

काठमाडौं। नेपाली टोलीका मुख्य प्रशिक्षक यमप्रसाद गुरुङले साफ महिला यु–२० च्याम्पियनसिपअन्तर्गत श्रीलंकाविरुद्ध हुने खेलमा गोलकिपर परिवर्तन गरेका छन्।

बंगलादेशको राजधानी ढाकास्थित बसुन्धरा किङ्स एरेनामा खेल नेपाली समय अनुसार साँझ ६:४५ बजे हुने तालिका थियो। तर, वर्षाका कारण मैदान हिलाम्मे भएपछि खेल पर धकेलिएको छ। अखिल नेपाल फुटबल संघ (एन्फा)का अनुसार खेल राति ८:१५ बजे हुनेछ।

गुरुङले नियमित गोलकिपर सुजता तामाङलाई आराम दिएका छन्। उनको स्थानमा लिला जैशी सुरुआती ११ मा उत्रिने छिन्। उनले नै कप्तानी जिम्मेवारीसमेत पाएकी छन्।

सुजताले भुटानविरुद्धको ६–१ को जित र बंगलादेशविरुद्धको ३–२ को हारमा पोस्ट सम्हालेकी थिइन्। उनले प्रतियोगितामा कुल ४ गोल खाएकी छन्।

‍