प्याट्रिक चुप, छटपटीमा एन्फा

काठमाडौं। पेनाल्टी सुटाआउटले बनाएको नेपाली महिला राष्ट्रिय टोलीको घाउलाई अहिले व्यवस्थापकीय प्रश्नले झन बल्झाएको छ। 

उज्बेकिस्तानमा सम्पन्न एएफसी महिला एसियन कप छनोटमा भएको त्यो घटनाक्रमले अखिल नेपाल फुटबल संघ (एन्फा)लाई औपचारिक स्पष्टीकरणको माग गर्न बाध्य पारेको छ।

नेपाली टोलीका मुख्य प्रशिक्षक प्याट्रिक डि वाइल्डलाई पत्र पठाउँदै अब घटनाको समीक्षा मात्रै होइन, उत्तरदायित्वको दस्तावेज बनाउने तयारी पनि गरिएको छ। एन्फा प्रवक्ता सुरेश शाहका अनुसार सचिवालयमार्फत पठाइएको सो पत्रमा उज्बेकिस्तानमा प्रतियोगिता अवधिभर के भयो भन्ने विस्तृत विवरण माग गरिएको छ।

तर, वाइल्डको जवाफ भने अझै आइसकेको छैन। उनले भने,‘के भएको हो? वास्तविकता के हो? त्यस विषयमा जानकारी माग गर्दै पत्र पठाइएको हो। तर, जवाफ फर्काउनु भएको छैन।’

यो सबै विवादको मूलमा छ कप्तान छनोट। त्यसपछिको वाइल्डले दिएको अन्तर्वार्ता। उक्त अन्तर्वार्ताले मैदानबाहिर हलचल मच्चाएको थियो। नियमित गोलकिपर तथा कप्तान अञ्जिला तुम्बाप्पो सुब्बालाई लाओससँगको खेलसँगै बेञ्चमा राखिएको थियो। 

लगत्तै एन्फाले रेनुका नगरकोटेलाई कप्तानी जिम्मेवारी दिएको थियो। तर, पछि कप्तानी आर्म ब्यान्ड भने स्ट्राइकर सावित्रा भण्डारीले लगाएकी थिइन्। लाओससँग ९–० र श्रीलंकासँग ८–० को फराकिलो जितपछि नेपालले निर्णायक खेलमा घरेलु टोलीविरुद्ध ३–३ को बराबरी खेलेको थियो।

त्यसपछि भएको पेनाल्टी सुटआउटमा नेपालले उज्बेकिस्तानसँग ४–२ हार बेहोर्‍यो। तर, त्यो हारले भन्दा पनि प्रशिक्षक र व्यवस्थापनबीचको समझदारीले नेपाली फुटबलभित्रको अस्थिरता उजागर गर्‍यो। प्रतिस्पर्धात्मक प्रदर्शनभन्दा बढी विवादका कुरा बाहिर आए।

यात्राको भित्री कथा भने उज्बेकिस्तानबाट टिम म्यानेजर, सहायक प्रशिक्षक र हेड अफ डेलिगेट्स स्वदेश फर्किएपछि सार्वजनिक भएको थियो। वाइल्ड भने त्यसअघि नै बेल्जियम फर्किसकेका थिए।

पत्रकार सम्मेलनमा टिम म्यानेजर बृन्दा देवान, सहायक प्रशिक्षक राजेन्द्र तामाङ र हेड अफ डेलिगेट्स सरिला श्रेष्ठले वाइल्डमाथि औंला तेर्साए। यी तीन जनाले प्रशिक्षकलाई नै मुख्य दोषी ठहर गरेपछि एन्फामा छटपटी मच्चिएको हो।

यही कारण वाइल्डको अनुबन्ध अब समयको हिसाबमा बाँकी छैन। बरु जिम्मेवारीको परीक्षणको बिन्दुमा भने रहने भएको छ। शाहका अनुसार वाइल्डसँग एक वर्षको सम्झौता छ। तर, उनले पठाउने विवरणले नै आगामी कार्यकालको निर्धारण गर्छ।

यो अवस्था आइपुग्नुमा महिला फुटबलको व्यवस्थापनमा पारदर्शिता, संवाद र आन्तरिक संयोजनको अभाव छर्लंग देखिन्छ। यसले पेनाल्टीको तीव्र क्षणमा चुकेको टोलीलाई नेतृत्वको अस्पष्टताले भविष्य नै अन्योलमा पार्नेछ। यस्तोमा एन्फा वाइल्डको स्पष्टीकरण पर्खिरहेको छ।