काठमाडौं। एभरेस्ट भलिबल क्लबलाई पराजित गर्दै न्यु डायमन्ड युथ स्पोर्ट्स क्लबले प्रचण्ड कप राष्ट्रिय महिला भलिबल प्रतियोगितामा तेस्रो स्थान हात पारेको छ।
पोखरा रंगशालास्थित कभर्डहलमा शनिबार सम्पन्न खेलमा न्यु डायमन्ड ३–० को सोझो सेटमा विजयी भएको हो। योसँगै एभरेस्टले समूहचरणमा बेहोरेको ३–० को हारको बदला लिने मौका गुमायो। न्यु डायमन्डले भने एक लाख रुपैयाँ हात पार्न सफल भएको छ।
न्यु डायमन्डले यसपल्ट पनि खेलको सुरुआतदेखि नै एभरेस्टलाई दबाबमा राख्यो। पहिलो सेट २५–८ ले सहजै आफ्नो पक्षमा पार्यो। दोस्रो सेटमा भने केही प्रतिस्पर्धा भए पनि न्यु डायमन्डले पुन: खेल २५–१८ ले जित्न सफल रह्यो।
तेस्रो तथा अन्तिम सेट भने जित्न न्यु डायमन्डलाई त्यही संघर्ष गर्नुपरेन र २५–११ ले नतिजा आफ्नो पक्षमा पार्दै एक लाख रुपैयाँ लिएर काठमाडौं फर्किने पक्का गर्यो।
