पोखरा। गण्डकी प्रदेश भलिबल संघमाथि पुनरागमन जित हासिल गर्दै एभरेस्ट भलिबल क्लब प्रचण्ड कप राष्ट्रिय महिला भलिबल प्रतियोगिताको सेमिफाइनलमा प्रवेश गरेको छ।
पोखरा रंगशालास्थित कभर्डहलमा बिहीबार सम्पन्न खेलमा एभरेस्टले ३–१ को पुनरागमन जित हासिल गरेको हो। योसँगै प्रतियोगिताको सेमिफाइनल समीकरण पूरा भएको छ। फाइनल प्रवेश गर्न विभागीय टोली एपिएफले न्यु डायमन्ड युथ स्पोर्ट्स क्लबसँग प्रतिस्पर्धा गर्नेछ। न्यु डायमन्ड पोल ‘बी’ को विजेता हो।
एपिएफ भने पोल ‘ए’को उपविजेता हो। न्यु डायमन्डले गण्डकी र एभरेस्टलाई समान ३–० को सोझो सेटमा पराजित गर्दै सेमिफाइनलमा स्थान बनाएको थियो। एपिएफले भने प्रतियोगिताकै कमजोर टोली स्टेप रामपुरलाई बिहीबार नै ३–० को सोझो सेटमा पाखा लगाउँदै न्यु डायमन्डसँगको भेट पक्का गरेको हो।
अर्को सेमिफाइनलमा पोल ‘ए’ को विजेता नेपाल पुलिस क्लबले एभरेस्टसँग खेल्नेछ। पुलिसले एपिएफ र रामपुरलाई समान ३–० को सोझो सेटमा पराजित गर्दै अन्तिम चारमा सहजै स्थान बनाएको हो।
एभरेस्टले अन्तिम चारमा स्थान बनाउनेक्रममा आफ्नो टोलीकी कप्तानसमेत रहिसकेकी अरुण शाहीको नेतृत्वमा रहेको गण्डकीविरुद्ध संघर्ष गर्नुपर्यो। पहिलो सेट निकै प्रतिस्पर्धात्मक बनेको थियो।
एक समय खेल २१–२१ को स्थितिमा थियो। तर, गण्डकीले एभरेस्टलाई त्यही अंकमा रोक्दै २५–२१ को जित हासिल गर्यो। तर, दोस्रो सेटमा एभरेस्ट हाबी भयो। अट्याकिङमा सुधार गरेको एभरेस्टले उक्त सेट २५–१४ ले सहजै आफ्नो बनायो।
योसँगै खेल १–१ को स्थितिमा पुगेको थियो। तर, तेस्रो सेट पुन: प्रतिस्पर्धात्मक बन्यो। तर, यसपल्ट पनि बाजी भने एभरेस्टले नै २५–२२ ले हात पार्यो। योसँगै खेल चौथो सेटमा धकालियो। तर, उक्त सेटमा पनि एभरेस्ट २५–१४ को सहज जित निकाल्न सफल रह्यो।
