पोखरा। गण्डकी भलिबल संघमाथि सहज जित निकाल्दै न्यु डायमन्ड युथ स्पोर्ट्स क्लब प्रचण्ड कप महिला राष्ट्रिय भलिबल प्रतियोगिताको सेमिफाइनलमा प्रवेश गरेको छ।
पोखरा रंगशालाको कभर्डहलमा बुधबार सम्पन्न खेलमा न्यु डायमन्डले ३–० को सोझो सेटमा गण्डकीलाई पाखा लगाएको हो।
जारी प्रतियोगितामा न्यु डायमन्डको यो लगातार दोस्रो जित हो। पहिलो खेलमा न्यु डायमन्डले एभरेस्ट भलिबल क्लबलाई ३–० ले नै पराजित गरेको थियो।
योसँगै न्यु डायमन्ड पोल ‘बी’ को विजेता बन्यो। अब न्यु डायमन्डले फाइनल प्रवेश गर्न पोल ‘ए’ का एपिएफ क्लब र स्टेप रामुपरबीचको विजेतासँग खेल्नेछ।
गण्डकीको भने यो पहिलो खेल हो। बिहीबार एभरेस्टको नतिजाले गण्डकीको आगामी यात्रा तय गर्नेछ। राष्ट्रिय टोलीका अधिकांश खेलाडी लिएर कोर्ट उत्रिएको न्यु डायमन्डले पहिलो सेट २५–८ ले सहजै आफ्नो पक्षमा पारेको थियो।
दोस्रो सेट पनि न्यु डायमन्डले २५–१० ले आफ्नै बनायो। तेस्रो तथा अन्तिम सेटमा पनि न्यु डायमन्डलाई त्यति संघर्ष गर्नु परेन। उक्त सेट २५–१२ ले जित्दै अन्तिम चारमा स्थान बनायो।
