पोखरा। स्टेप रामपुरमाथि सहज जित निकाल्दै विभागीय टोली नेपाल पुलिस क्लबले प्रचण्ड कप राष्ट्रिय महिला भलिबल कप प्रतियोगिताको सेमिफाइनलमा स्थान बनाएको छ।
पोखरा रंगशालाको कभर्डहलमा बुधबार सम्पन्न पोल ‘ए’ को दोस्रो खेलमा पुलिसले रामपुरलाई ३–० को सोझो सेटमा पराजित गरेको हो।
जितसँगै पुलिस पोल ‘ए’ को विजेता बन्यो। पुलिसले उद्घाटन खेलमा अर्को विभागीय टोली एपिएफ क्लबलाई ३–० ले नै पाखा लगाएको थियो।
त्रिभुवन आर्मी क्लबले प्रतियोगिता सहभागिता जनाउन नमानेपछि रामपुरलाई स्थान दिइएको थियो। तर, अधिकांश राष्ट्रिय खेलाडी लिएर कोर्ट उत्रिएको पुलिसलाई रामपुरले कुनै सेटमा पनि चुनौती दिन सकेन।
पहिलो सेट पुलिसले २५–७ ले आफ्नो पक्षमा पारेको थियो। त्यसपछिका बाँकी दुई सेट भने २५९ र २५–९ ले आफ्नो बनाउँदै अन्तिम चारमा स्थान सुरक्षित गरेको हो।
पुलिसले अब फाइनल प्रवेश गर्न अर्को पोलको उपविजेतासँग खेल्नेछ।
