काठमाडौं। १७ वर्षीय स्पेनी विंगर लामिन यमलले बार्सिलोनासँग २०३१ सम्म सम्झौता थप गर्ने तयारी गरेका छन्।
क्लब अध्यक्ष जोआन लापोर्टा र यमलका एजेन्ट जोर्ज मेन्डेसबीच सोमबार भेट भएको थियो। बार्सिलोनामा भएको उक्त भेटपछि सम्झौता थप गर्ने तयारी गरिएको बताइएको छ।
यमलको सम्झौता सन् २०२६ मा सकिनेछ। तर, क्लबले केही महिनादेखि उनको सम्झौता नवीकरण गर्न प्रयास गरिरहेको थियो। मेन्डेसले गत साता यमलसँग भेट गरेका थिए।
अन्तिम टुंगो लाग्न बाँकी भए पनि क्लब र यमल दुवै पक्ष सकारात्मक भएको थियो र सहमतिको चरणमा पुगेको बताइएको छ।
१८ वर्षे उमेर पुग्नै लागेका यमलले पहिले पनि पटक–पटक सार्वजनिक रूपमा बार्सिलोना मै रहन चाहेको बताएका छन्। उनले क्लबको पहिलो टोलीका लागि सयभन्दा बढी खेलमा सहभागिता जनाइसकेका छन्।
उनले सन् २०२३ मा आफ्नो हालको सम्झौतामा हस्ताक्षर गरेका थिए। तर, त्यसबेला उनी १८ वर्षभन्दा कम भएकाले तीन वर्षको मात्र सम्झौता गर्न पाएका थिए।
अध्यक्ष लापोर्टाले यमलको तलबमा ठूलो वृद्धि गर्ने र विभिन्न बोनस दिने तयारी गरेका छन्। यस किसिमको सम्झौता शैली लापोर्टाले पहिले २००३–२०१० को कार्यकालमा पनि प्रयोग गरेका थिए। २०२१ मा पुनः निर्वाचित भएपछि पनि यस्तै रणनीति अपनाइरहेका छन्।
नयाँ सम्झौतामा यदि यमलले बालोन डी’ओर जितेमा विशेष बोनस पाउने प्रावधान हुनेछ। यमललाई फुटबलको यो प्रतिष्ठित व्यक्तिगत अवार्डका लागि भविष्यका दावेदारको रूपमा हेरिएको छ।
यस सिजन उनले ५५ खेलमा १८ गोल र २५ असिस्ट गर्दै उत्कृष्ट प्रदर्शन गरेका छन्। च्याम्पियन्स लिग सेमिफाइनलमा इन्टर मिलानविरुद्ध र रियल मड्रिडसँगको ‘एल क्लासिको’ मा उनले निर्णायक भूमिका खेलेका छन्।
उनको यो उत्कृष्ट प्रदर्शनसँगै बार्सिलोनाले यस सिजन ला लिगा, कोपा डेल रे र स्पेनिस सुपर कोपा जित्दै ‘डोमेस्टिक ट्रेबल’जितेको थियो। मुख्य प्रशिक्षक हान्सी फ्लिकको यो पहिलो सिजन थियो।
यमल सात वर्षको उमेरमा बार्सिलोनाको एकेडेमीमा प्रवेश गरेका थिए। १५ वर्षको उमेरमा तत्कालीन प्रशिक्षक जाभी हर्नान्डेजले सिनियर टोलीमा डेब्यु गराएका थिए।
-1748355409.jpeg)
