काठमाडौं। ६ वर्षपछि इस्कोले स्पेनको राष्ट्रिय टोलीमा पुनरागमन गरेका छन्।
मुख्य प्रशिक्षक लुइस डे ला फुएन्तेले युरोपियन नेसन्स लिग सेमिफाइनल खेलका लागि २६ सदस्यीय टोली घोषणा गरेका छन्। उक्त टोलीमा इस्को पनि समेटिएका हुन्। तर, चोटबाट फर्केका म्यानचेस्टर सिटीका मिडफिल्डर रोड्री भने टोलीबाहिर छन्।
स्पेनले जुन ५ मा जर्मनीको स्टुटगार्टमा फ्रान्ससँग सेमिफाइनल खेल्नेछ। अर्को सेमिफाइनल जुन ४ मा म्युनिखमा जर्मनी र पोर्चुगलबीच हुनेछ।
३३ वर्षीय इस्को अहिले रियल बेटिसबाट खेलिरहेका छन्। उनी सन् २०१९ यता राष्ट्रिय टोलीबाट बाहिर थिए। तर, यस सिजन लिगमा गरेको उत्कृष्ट प्रदर्शनको आधारमा उनलाई फेरि टोलीमा समावेश गरिएको हो।
‘उनी कति समय टिमबाहिर थिए भन्ने म कहिल्यै हेर्दिन,’ प्रशिक्षक फुएन्तेले भने,‘यो इस्को फर्किनका लागि उचित समय हो। उनले टिममा योगदान दिनेछन्। यदि म त्यसो नसोच्ने थिएँ भने उनी टिममै हुने थिएनन्।’
रोड्री भने हालै मात्रै लामो समयको घुँडाको चोटपछि सिटीमा फर्किएका थिए। तर, १० मिनेट मात्र खेलेका थिए। प्रशिक्षकले उनलाई अहिले नै राष्ट्रिय टोलीमा बोलाउनु जोखिमपूर्ण हुने बताएका छन्।
‘उनी निकै महत्वपूर्ण खेलाडी हुन्, तर उनी ८ महिना टिमबाहिर थिए। हामीबीच कुराकानी भएको थियो र अहिले नै उनलाई बोलाउनु जोखिम हुने निर्णयमा पुगेका छौं,’ फुएन्तेले भने। बार्सिलोनाका युवा मिडफिल्डर गाभीले पनि गम्भीर चोट बेहोरेका थिए। तर, उनी टोलीमा समेटिएका छन्।
टोलीमा लामिन यमल, पेड्री र डानी ओल्मो (बार्सिलोना) र निको विलियम्स (एथ्लेटिक क्लब) पनि परेका छन्। तर, इञ्जिगो मार्टिनेज (बार्सिलोना) र राउल एसेन्सियो (रियल मड्रिड) भने टिमबाहिर छन्।
-1748355409.jpeg)
