अल–नासरको एएफसी च्याम्पियन्स लिग छनोट हुने सम्भावना बलियो
काठमाडौं। क्रिस्टियानो रोनाल्डोका लागि निराशाजनक देखिएको सिजन अन्ततः अप्रत्याशित सुखद मोडमा अन्त्य हुन सक्ने संकेत देखिएको छ। कारण उनको क्लब अल–नासरले अपिल जित्दै तीन अंक थपेको छ। योसँगै क्लबले एएफसी च्याम्पियन्स लिग (एसियाको शीर्ष क्लब प्रतियोगिता) मा छनोट हुने सम्भावना बलियो बनाएको छ।
साउदी अरब फुटबल महासंघले सोमबार बिहान यो निर्णय सार्वजनिक गरेको थियो। यो ठिक साउदी प्रो लिगको अन्तिम खेलको केही घण्टा अघि सार्वजनिक भएको हो। पहिले चौथो स्थानमा रहेको अल–नासर प्रतियोगिताबाट बाहिरिने संघारमा थियो। तर, अपिलबाट थपिएका तीन अंकले अल–नासरलाई तेस्रो स्थानमा पुर्याएको छ। अल–हिलाललाई ओभरटेक गर्दै दोस्रो स्थान हासिल गर्ने सम्भावना पनि बाँकी छ।
सोमबार साँझ अल–नासरले अल–फातेहसँग खेल्नेछ। अल–हिलालले अल–काद्सियासँग भिड्नेछ। यदि अल–नासर तेस्रोमै समाप्त हुन्छ भने एसियाको दोस्रो तहको प्रतियोगिता एएफसी च्याम्पियन्स कप लिग २ मा जानेछन्।
यो विवाद मार्चमा अल–ओरुबासँगको २–१ को हारपछि सुरु भएको थियो। अल–नासरले अल–ओरुबाको गोलकिपर राफि अल–रुवैली पूर्ण व्यवसायिक खेलाडी नभएको भन्दै उजुरी दर्ता गरेको थियो।
महासंघले अल–नासरको पक्षमा निर्णय दिँदै तीन अंक दिलाएको हो। साथै, अल–ओरुबा अब रेलिगेट हुने निश्चित भएको छ।
रोनाल्डो पाँचपटकको बल्लन डि’ओर विजेता हुन्। हाल साउदी अरबमा खेल्ने सबैभन्दा ठूलो स्टार मानिन्छन्। तर, उनको अनुबन्ध जुन ३० मा सकिँदैछ। उनी अर्को सिजन अल–नासरमै रहने या नरहने विषय अझै स्पष्ट छैन।
डिसेम्बर २०२२ मा ठूलो रकममा क्लबमा प्रवेश गरेका रोनाल्डोले अझसम्म ठूलो उपाधि जित्न सकेका छैनन्। तर, यस सिजन २४ गोल गर्दै उनी लिगको शीर्ष स्कोरर बनेका छन्।
फिफा क्लब विश्वकप जुन १४ देखि अमेरिका हुँदैछ। त्यहाँ सहभागी हुन उनले ऋण सम्झौतामार्फत अर्कै क्लबमा सामेल हुने सम्भावना पनि देखिएको छ।
