काठमाडौं। पेरिस सेन्ट–जर्मेन (पिएसजी) का मुख्य प्रशिक्षक लुइस एनरिकेले आर्सनलविरुद्ध च्याम्पियन्स लिग सेमिफाइनलको पहिलो लेगमा उत्कृष्ट बचाउ प्रदर्शन गरेका गोलकिपर जियानलुइजी डोनारुम्मालाई ‘टाइटन’ भनेर प्रशंसा गरेका छन्।
इटालीका गोलकिपर डोनारुम्माले मंगलबार राति भएको खेलमा ग्याब्रियल मार्टिनेली र लिआन्ड्रो ट्रोसार्डका सटहरू एक हातले रोक्दै पिएसजी लाई १–० को जितमा क्लिन सिट सुरक्षित गराए।
यसअघि पनि उनले नकआउट चरणमा उत्कृष्ट प्रदर्शन गर्दै एनफिल्डमा लिभरपुलविरुद्ध भएको प्रि–क्वार्टरफाइनलअन्तर्गत पेनाल्टी सुटआउटमा दुई बचाउ गरेका थिए। त्यस्तै, एस्टन भिल्लाविरुद्धको दोस्रो लेगको दोस्रो हाफमा गरेको सानदार प्रदर्शनकै कारण पिएसजी क्वार्टरफाइनल पार गर्न सफल भएको थियो।
एनरिके सामान्यतया टोलीको सामूहिक प्रयासको प्रशंसा गर्न रुचाउँछन्। तर, यसपटक उनले डोनारुम्माको विशेष तारिफ गरे। ‘म १४–१५ खेलाडीको मिहिनेतको चर्चा गर्न चाहन्छु। तर, यस्तो उत्कृष्ट सेट–पिस टोलीविरुद्ध खेल्दा गोल पोस्टमा एउटा टाइटन चाहिन्छ,’ एनरिकेले भने।
यद्यपि, डोनारुम्माले खेलमा एउटा त्रुटि गरे। दोस्रो हाफको सुरुआतमा डेक्लान राइसको फ्रिकिकमा उनी बल टिप्न अघि बढेका थिए। तर, बीचमै निर्णय परिवर्तन गर्दै गोल पोस्ट खाली छाडेका थिए। मिकेल मेरिनोले त्यसै मौकामा गोल गरेका थिए। तर, भिएआरले मेरिनो अफसाइड रहेको देखाएपछि गोल मान्यता दिइएन।
२६ वर्षीय डोनारुम्माको गालामा गत डिसेम्बरमा मोनाकोविरुद्ध लागेको चोटको दाग अझै छ। पुरै खेलमा उनी आत्मविश्वासपूर्ण देखिए। ट्रोसार्डको बायाँ खुट्टाको सटलाई उनले जुन चलाखिका साथ पन्छाए, त्यो विशेष उल्लेखनीय थियो।
‘उनले लिभरपुल र भिल्लाविरुद्ध जस्तै बचाउ गरे,’ आर्सनल प्रशिक्षक मिकेल आर्टेटाले भने,‘यही हो च्याम्पियन्स लिगमा फरक पर्ने कुरा।’ डोनारुम्माले उत्कृष्ट प्रदर्शन गर्दै फेरि एकपटक आफूलाई प्रमाणित गरेका छन्। उनी इङ्ल्यान्डमा झन् आत्मविश्वासी देखिन्छन्।
सन् २०२० को युरोकप फाइनलमा वेम्बली स्टेडियममा इङ्ल्यान्डविरुद्ध पेनाल्टी सुटआउटमा गरेका बचाउ अझै उनका करियरका उच्च क्षण हुन्। तर, क्लब स्तरमा भने उनी पिएसजीलाई इतिहासकै पहिलो च्याम्पियन्स लिग उपाधितर्फ डोर्याउन महत्त्वपूर्ण भूमिका खेलिरहेका छन्।
