लियोन नवौंपल्ट च्याम्पियन्स लिगको उपाधिनजिक

काठमाडौं। आठपल्टको महिला च्याम्पियन्स लिग विजेता लियोनले सेमिफाइनलको पहिलो लेगमा आर्सनलमाथि २–१ को जित निकालेको छ।

योसँगै लियोनले फाइनल पुग्ने सम्भावनालाई बलियो बनाएको छ। लन्डनको इमिरेट्स स्टेडियममा शनिबार भएको खेलमा लियोनले दोस्रो हाफमा आर्सनलको पुनरागमन प्रयासलाई रोक्दै आफ्नो नवौं लगातार जित दर्ता गरेको हो।

‘यो प्रतियोगिताको यस्तो चरण हो, जहाँ नतिजा नै सबैथोक हो। कहिलेकाहीँ फुटबल राम्रो देखिँदैन, तर हाम्रा खेलाडीहरू कठिन क्षणमा समाधान खोज्न सक्छन्,’लियोनका प्रशिक्षक जो मोंटेमुरो (पूर्व आर्सनल प्रशिक्षक) ले भने।

२१ वर्षीया हाइटीकी फरवार्ड मेल्ची डुमोर्नेले ८२औं मिनेटमा निर्णायक गोल गर्दै लियोनलाई अग्रता दिलाइन्। उनले आर्सनलको डिफेन्स चिर्दै लो फिनिसमार्फत गोल गरिन्। यसअघि ७८औं मिनेटमा आर्सनलकी मारियोना काल्देन्टेले पेनाल्टीमार्फत बराबरी गोल गरेकी थिइन्।

पेनाल्टी गोल भिएआर समीक्षापछि दिइएको थियो। लियोनकी गोलकिपर क्रिस्टियाने एन्ड्लरले कर्नर क्लियर गर्ने क्रममा आर्सनल कप्तान लिया विलियमसनको टाउकोमा कुहिनाले प्रहार गरेको देखिएको थियो।

खेलको १७औं मिनेटमा फ्रान्सकी विंगर कडिडियातु डियानीले गरेको गोललाई सुरुआतमा अफसाइड घोषणा गरिएको थियो। तर, भिएआर समीक्षापछि गोल मान्यता दिइएको थियो।

लियोन यस सिजन पनि सबै प्रतियोगितामा अपराजित रहँदै आएको छ। दोस्रो लेग अप्रिल २७ मा लियोनमै हुनेछ, जहाँ घरेलु टोलीले आफ्नो १२औं फाइनल र नौं उपाधिको लक्ष्य पछ्याउनेछ।