मर्सीसाइड डर्बीमा जोटा निर्णायक

काठमाडौं। डिओगो जोटाले बुधबार ‘मर्सीसाइड डर्बी’मा निर्णायक गोल गर्दै लिभरपुललाई एभर्टनविरुद्ध १–० को जित दिलाए। यस जितसँगै लिभरपुलले प्रिमियर लिगको उपाधि दौडमा आफ्नो पकड बलियो बनाएको छ।

पोर्चुगलका फरवार्ड जोटाले दोस्रो हाफमा ५७औं मिनेटमा गोल गर्दै एनफिल्डमा लिभरपुललाई महत्त्वपूर्ण तीन अंक दिलाए। यो जितपछि लिभरपुलले शीर्ष स्थानमा १२ अंकको अग्रता कायम राख्दै आर्सनललाई पछि पारेको छ।

सिजनका बाँकी आठमध्ये यो खेल लिभरपुलका लागि सबैभन्दा कठिन चुनौतीपूर्णमध्ये एक मानिएको थियो। जोटाले विपक्षी डिफेन्स लाइन भत्काउँदै गोलकिपर जोर्डन पिकफोर्डलाई छलाएर उत्कृष्ट गोल गरे।

लिभरपुलका प्रशिक्षक अर्ने स्लटले जितपछि भने,‘हामी हाम्रो सिजनलाई सकेसम्म उत्कृष्ट बनाउन प्रयास गरिरहेका छौं। एभर्टनले आज फेरि प्रमाणित गर्‍यो कि प्रिमियर लिगमा खेल जित्न कत्तिको गाह्रो छ।’

उनले थपे,‘अब हामीले आठ कठिन खेलहरू खेल्नुपर्नेछ। तर, खेलाडीहरूले आज जति मिहिनेत गरे र समर्थकहरूले जति साथ दिए यदि त्यही निरन्तर रह्यो भने हामी राम्रो स्थानमा रहनेछौं।’

सिजनभर उत्कृष्ट लयमा देखिएको लिभरपुल पछिल्लो केही सातामा केही कमजोर देखिएको थियो। पेरिस सेन्ट जर्मेन (पिएसजी)सँग च्याम्पियन्स लिगमा पराजित भएर बाहिरिएको लिभपुल इङ्लिस लिग कपको फाइनलमा न्युकासलसँग पराजित भएको थियो।

यसैबीच मंगलबार आर्सनलले फुलह्यामलाई हराएपछि उपाधि दौड अझ प्रतिस्पर्धात्मक बन्ने सम्भावना देखिएको थियो। पहिलो हाफमा एभर्टनका बेटोले गोल गरे पनि अफसाइडको कारण रद्द भयो। त्यसपछि उनले पोस्टमा प्रहार गरे, जसले गर्दा लिभरपुलका समर्थकहरू केही चिन्तित भए।

तर, खेलाडीहरूले धैर्य देखाउँदै दोस्रो हाफमा जोटाको गोलमार्फत जित हात पारे। ११ खेलपछि जोटाले पहिलो गोल गरेका हुन्। यस जितपछि लिभरपुललाई उपाधि पक्का गर्न अब १३ अंक आवश्यक छ।

एभर्टनका डिफेन्डर जेम्स टार्कोव्स्कीले खेलको सुरुआतमै लिभरपुलका एलेक्सिस म्याक एलिस्टरलाई ट्याकल गरे। प्रिमियर लिगले यसलाई रिफ्लेस (लापरवाह) ट्याकल भनेको छ। 

तर, रेफ्री सामुएल बारोटले उनलाई पहेंलो कार्ड मात्र दिए। भिएआर समीक्षा भए पनि उनलाई रातो कार्ड देखाइएन।