प्लानिङ ब्वाइजको अपराजित यात्रा कायमै

काठमाडौं। प्लानिङ ब्वाइज युनाइटेडले सहिद स्मारक ‘बी’ डिभिजन लिगमा अपराजित यात्रा कायमै राखेको छ।

सातदोबाटोस्थित एन्फा कम्प्लेक्समा बुधबार सम्पन्न खेलमा प्लानिङले ब्वाइज युनियन क्लबलाई २–१ गोलले पराजित गरेको हो। प्लानिङको यो लगातार चौथो जित हो।

प्लानिङले १२ अंकसहित शीर्ष स्थानमा फर्किएको छ। पराजित ब्वाइज युनियनको भने समान खेलबाट तीन अंकसहित नवौं स्थानमा छ।

प्लानिङको जितमा प्रताभसिंह राई र रुजन न्यौपानेले गोल गरे। यता, ब्वाइज युनयिनको लागि सञ्जीव लामाले गरेको गोल सान्त्वना बन्यो। 

खेलको १२औं मिनेटमा प्रताभको गोलबाट प्लानिङले सुरुआती अग्रता लियो। तर, ४७औं मिनेटमा सञ्जीवले गोल गर्दै ब्वाइज युनियनलाई खेलमा फर्काए। त्यसको सात मिनेटपछि रुजनले अर्को गोल गर्दै प्लानिङको जित पक्का गरे।