साकाको विजयी पुनरागमन

काठमाडौं। बुकायो साकाले आफ्ना हात फैलाए। अनुहारमा मुस्कानसहित आर्सनल समर्थकहरूको प्रेम ग्रहण गरे। उनी घाइते भएर मैदान बाहिर बसेको तीन महिना जति भइसकेको थियो। तर, खेलमा फर्किंदा उनी पहिलेझैं चम्किए।

एमिरेट्स स्टेडियममा मंगलबार फुलहमविरुद्ध २–१ को जितमा साकाले निर्णायक गोल गर्दै आर्सनललाई शीर्ष स्थानमा रहेको लिभरपुलसँगको दूरी नौ अंकमा झार्न मद्दत गरे।

६६औं मिनेटमा वैकल्पिक खेलाडीको रूपमा मैदान छिरेका साकालाई समर्थकहरूले ठूलो उत्साहसाथ स्वागत गरेका थिए। मैदान फर्किएको सात मिनेटमै उनले स्टेडियममा पुनः उत्साह जगाउँदै टिमको दोस्रो गोल गरे।

‘उनलाई कति माया गर्छन् भन्ने देखियो, प्रशिक्षक मिकेल आर्टेटाले भने,‘उनी मैदानमा आएपछि स्टेडियम नै उठेको जस्तो भयो।’

मिडफिल्डर डेक्लान राइसले साकालाई ‘विश्वकै उत्कृष्ट विंगरमध्ये एक’ भन्दै प्रशंसा गरे। ‘उनी बक्सभित्रबाट आक्रमण गर्छन् र गोलको मौका सिर्जना गर्छन्,’ राइसले भने,‘बुकायो फर्किएपछि हाम्रो टिमलाई ठूलो उर्जा मिलेको छ।’ 

पहिलो हाफको ३७औं मिनेटमा मिकेल मेरिनोले आर्सनलका लागि पहिलो गोल गरेका थिए। अब लिभरपुलले बुधबार एभर्टनविरुद्ध खेल्नेछ। त्यसपछि प्रिमियर लिगमा आठ खेलमात्र बाँकी रहनेछ।