खेलकुद अभियन्ता शाही सम्मानित

काठमाडौं । फाप्ला अन्तर्राष्ट्रिय क्रिकेट मैदान एवम् खेलग्राम पूर्वाधार निर्माण समितिका अध्यक्ष सुवास शाही सम्मानित भएका छन् । नेपाली खेलकुदमा उल्लेखनीय योगदान पुर्याएको योगदानको कदर गर्दै उनलाई सम्मान गरिएको हो ।

डीपीएल (धनगढी प्रिमियर लिग) मार्फत् नेपालमा फ्रेन्चाइज प्रतियोगिता सुरुआत गरेका शाही नवौं बृहत् राष्ट्रिय पुस्तक प्रदर्शनी तथा शैक्षिक महोत्सव २०८१ उद्घाटनको अवसरमा सुदूरपश्चिम प्रदेश सरकारका मुख्यमन्त्री कमलबहादुर शाहीबाट सम्मान भएका हुन् । १४ वर्षअघि कलेज क्रिकेट प्रतियोगिताको रुपमा सुरु गर्दै एसपीए कपलाई डीसीएल (धनगढी क्रिकेट लिग) हुँदै डीपीएलमा विस्तार गरिएको थियो ।

(एनएसएल) नेपाल सुपर लिग टिम धनगढी एफसीसमेत सञ्चालन गरिरहेका शाही धनगढीलाई क्रिकेटको सहरको रुपमा स्थापित गर्ने अभियानमा छन् । उनको टिम धनगढीले एनएसएलका दुवै संस्करणको फाइनल खेलेको थियो ।