खेलकुदमा कांग्रेसले गुमाएको अवसर

समाचार टिप्पणी । 

काठमाडौं । कांग्रेसका खेलकुद नेता सार्वजनीक मञ्चहरुमा प्राय टिप्पणी गर्थे, पाटी र नेताहरुले खेलकुदलाई हेपे । यसको महत्वनै बुझेन । खेलकुदमार्फत युवा र देशभर पार्न सकिने प्रभावका फेहरिस्त उदाहरण प्रस्तुत गर्थे । सत्ता राजनीतिमा खेलकुद मन्त्रालय सधै छायाँमै रहन्छ । ठुला पाटीका नजर मालदार मन्त्रालयमा रहदा, खेलकुदमा कांग्रेसले खासै आखाँ पनि लगाएन । जति मन्त्री पाए, ती पाटी राजनीतिमा खासै दम राख्ने पनि भएनन् ।  

डिगबहादुर लिम्बुपछि खेलकुद मन्त्रालय पुन कांग्रेसको पोल्टामा छ । तर कांग्रेसको खेलकुदमा प्रभाव पुरै शुन्यप्राय देखिन्छ । मन्त्री तेजुलाल चौधरीले खेलकुद मन्त्रालय हाँक्न सकेका छैनन् । एउटा उनीसँग खेलकुदको ज्ञान भएन, अर्को उनको खेलकुद बनाउने सोच पनि देखिदैन ।  

मन्त्रीको हैसियतमा चौधरीले न रिक्त उपाध्यक्ष नियुक्त गर्न सकेका छन्, न त राखेपको बोर्ड सदस्य भर्न सकेका छन् । मन्त्रीले गरेको भए, यति बेला खेलकुद कांग्रेसमय हुन्थ्यो । उपाध्यक्ष उनकै हुन्थे, कांग्रेसी बोर्ड सदस्यहरुको रजगज चल्थ्यो । राखेपको कार्यकारी बोर्ड सदस्यहरु उनै चौधरीले मनोनित गर्न पाउथे । तर मन्त्री असक्षम भएपछि कांग्रेसले खेलकुदको कार्यकारी निकायमा प्रभाव जमाउने अवसर गुमाएको छ । मन्त्रीकै असक्षमता कारण यस वर्ष कर्णाली प्रदेशमा हुने भनिएको दशौं राष्ट्रिय खेलकुद हुने÷नहुनेमा अन्यौल छ । उनको असक्षमताको भार कांग्रेसले मात्र हैन, पुरै देशले ब्यहोर्ने अवस्था आईलागेको छ । 

मन्त्रालय मात्र हैन, खेलकुदको अन्तराष्ट्रिय ढोकाको रुपमा रहने नेपाल ओलम्पिक कमिटिको नेतृत्व समेत कांग्रेसले गुमाउने अवस्था बनेको छ । कांग्रेसभित्रकै बेमेल र केहीको स्वार्थ केन्द्रित व्यवहारका कारण पुन जीवनराम श्रेष्ठ नेपाल ओलम्पिक कमिटिमा बलिया बनेका छन् । कांग्रेसभित्र बिग्रह देखिदा जीवनरामले विवादास्पद विधान संशोधनको निर्णय गराएका छन् भने महासचिवमा चतुरानन्द वैद्यलाई बचन दिएर कांग्रेसभित्र पूर्ण रुपमा खेल्न पुगेका छन् । कांग्रेसको वर्चस्व रहेको ओलम्पिक भित्र केही नेताको स्वार्थ केन्द्रित निर्णयका कारण कांग्रेस नेतृत्वमा हार्ने अवस्था सिर्जना बनेको छ । 

नेतृत्वमा दाबी गरिरहेका कांग्रेसका सुनिलकुमार श्रेष्ठलाई पाटीभित्रकै खेलकुद संघको नेतृत्मा रहेका नेताबाट सहयोग छैन । कांग्रेस पृष्ठभुमीका अधिकांश खेलकुद संघका नेता वर्तमान अध्यक्ष जीवनराम श्रेष्ठको पिछलग्गु बन्दा ओलम्पिकमा कांग्रेसको अवस्था बलियो बन्न नसकेको छैन । कांग्रेसको खेलकुद विभाग र भातृ संगठनको रुपमा रहेको नेपाल खेलकुद महासंघले नेपाल ओलम्पिक कमिटिको वर्तमान नेतृत्वविरुद्ध बिज्ञप्ति जारी गरेका छन्, तर आफ्नै पार्टीका खेलकुद संघका नेतृत्वलाई एक ठाउँमा ल्याउने ल्याकत देखिदैन । खेलकुद विभाग र खेलकुद महासंघका नेताहरुलाई कांग्रेस पाटीको नाममा खेलकुद संघहरुमा रहेका नेतृत्वले ‘असली हैसियत’ देखाईदिएका छन् ।