च्याम्पियन्स ट्रफीबारे छलफल गर्न आइसिसीले बोलायो आपतकालीन बैठक

काठमाडौं। सन् २०२५ को च्याम्पियन्स ट्रफीबारे छलफल गर्न आइसिसीले नोभेम्बर २६ मा बोर्डको आपतकालीन बैठक बोलाएको छ। बैठकको एजेन्डा पाकिस्तान र अन्य देशमा आयोजना हुने प्रतियोगिताको लागि हाइब्रिड मोडेल अपनाउने हो कि होइन भन्ने हो।

प्रतियोगिता सुरु हुन अब १०० दिनभन्दा कम समय बाँकी छ। आयोजक पाकिस्तान क्रिकेट बोर्ड (पिसिबी)ले फेब्रुअरी १९ देखि मार्च ९ सम्म प्रतियोगिता गर्ने तय गरेको छ। तर, आइसिसीले अहिलेसम्म तालिका सार्वजनिक गरेको छैन। त्यसको सामना गर्नुभन्दा पनि ठूलो बाधा अर्को छ।

भारत सरकारले रोहित शर्माको टोलीलाई पाकिस्तान भ्रमणको अनुमति नदिएको बिसिसिआईले आइसिसीलाई जानकारी दिएको छ। पाकिस्तानलाई नोभेम्बर २०२१ मा यो आठ टोलीको एकदिवसीय प्रतियोगिताको आयोजना गर्ने अधिकार प्रदान गरिएको थियो। प्रतियोगिताका खेलहरू लाहोर, कराँची र रावलपिंडी हुने तय छ।

भारतका कारण पाकिस्तानले हाइब्रिड मोडलमा प्रतियोगिता आयोजना गर्ने प्रश्नको सामना गर्नु परेको यो लगातार दोस्रो वर्ष हो। गत वर्ष पनि भारतले एसिया कपका लागि पाकिस्तान जान अस्वीकार गरेको थियो। त्यसैले पाकिस्तान र श्रीलंकामा हाइब्रिड मोडलमा प्रतियोगिता आयोजना गर्नुपरेको थियो।

तर, पाकिस्तान एकदिवसीय विश्वकप खेल्न भारत जानु परेको थियो। यस हप्ताको सुरुमा भारतले टी २० ब्लाइन्ड क्रिकेट विश्वकपबाट आफ्नो नाम फिर्ता लिएको थियो।