युएईसँग नेपाल पराजित

काठमाडौं। पूजा महतोको सानदार ब्याटिङका बाबजुद नेपाल आइसिसी महिला यु–१९ विश्वकपको एसिया छनोटमा पराजित भएको छ।

शनिबार भएको तेस्रो खेलमा नेपाल घरेलु टोली युएईसँग १३ रनले पराजित भएको हो। राउन्ड रोबिनमा भइरहेको प्रतियोगितामा नेपालको यो पहिलो हार हो। यसअघि नेपालले थाइल्यान्डलाई ६७ र कुवेतलाई १०८ रनले पराजित गरेको थियो। युएई भने अपराजित छ। अब नेपालले यही तीन टोलीसँग समान एकपल्ट खेल्नेछ। शीर्ष दुई टोली फाइनलमा भिड्ने छन्। विजेताले विश्वकपमा स्थान पक्का गर्नेछ।

युएईले दिएको १२३ रनको लक्ष्य पछ्याएको नेपालले निर्धारित २० ओभरमा पाँच विकेट गुमाउँदै १०९ रन मात्रै बनाउन सक्यो।

नेपाली टोलीका कप्तान पूजाले यसपल्ट पनि उत्कृष्ट प्रदर्शन गरिन्। अघिल्ला दुई खेलमा थाइल्यान्डसँग ३५ र  कुवेतसँग ३४ रन बनाएकी उनी यसपल्ट अर्धशतकबाट चुकिन्। ४३ बल खेलेकी उनले पाँच चौकासहित ४८ रन बनाइन्।

ओपनर साना प्रभिन र उपकप्तान सोनी पाख्रिन समान १९ रनमा पेभिलियन फर्किए। ज्योत्सिका मरासिनी ११ रनमा अविजित रहँदा अन्यले सााथ दिन सकेनन्। युएईका इन्धुजा नन्दाकुमारी, लावन्या केनी र मेहक ठाकुरले समान एक विकेट लिइन्।

त्यसअघि अजमानको द सेभेन स्टेडियममा टस जितेर पहिला ब्याटिङ थालेको घरेलु टोलीले निर्धारित २० ओभरमा ७ विकेट गुमाउँदै १२२ रन बनाएको थियो।

युएईकी रिनिथा रजितले सर्वाधिक ४८ रन बनाइन्। ३३ बल खेलेकी उनले पाँच चौका र दुई छक्का प्रहार गरिन्। ओपनर लावन्या  २० र इन्धुजाले १२ रनको योगदान दिइन्। अन्यको प्रदर्शन उत्साहजनक हुन सकेन।

नेपालकी रिया शर्माले सर्वाधिक तीन विकेट लिइन्। पुजा महतो, करिष्मा गुरु र सीमा केसीको नाममा समान एक विकेट रह्यो।