युएईले नेपाललाई दियो १२३ रनको लक्ष्य

काठमाडौं। युएईकी रिनिथा रजित अर्धशतकबाट दुई रनले चुकेसँगै नेपालले आइसिसी महिला यु–१९ विश्वकपको एसिया छनोटमा १२३ रनको लक्ष्य पाएको छ।

अजमानको द सेभेन स्टेडियममा टस जितेर पहिला ब्याटिङ थालेको घरेलु टोलीले निर्धारित २० ओभरमा ७ विकेट गुमाउँदै १२२ रन बनाएको हो।

युएईकी रिनिथाले सर्वाधिक ४८ रन बनाइन्। ३३ बल खेलेकी उनले पाँच चौका र दुई छक्का प्रहार गरिन्। ओपनर लावन्या केनी २० र इन्धुजा नन्दकुमारले १२ रनको योगदान दिइन्। अन्यको प्रदर्शन उत्साहजनक हुन सकेन।

नेपालकी रिया शर्माले सर्वाधिक तीन विकेट लिइन्। पुजा महतो, करिष्मा गुरु र सीमा केसीको नाममा समान एक विकेट रह्यो।