एसिया रग्बीमा १७ राष्ट्रले सहभागिता जनाउने

काठमाडौं। एसिया रग्बीको आयोजना र नेपाल रग्बी संघको व्यवस्थापनमा दशरथ रंगशालामा आयोजना हुने एसिया रग्बी इमिरेट्स सेभेन्स ट्रफीमा सहभागी हुने १७ राष्ट्रको घोषणा भएको छ।

सहभागी राष्ट्रमा पुरुष तर्फ १४ र महिला तर्फ ८ टोली  रहने छन्। प्रतियोगिताका लागि ४ सय ५० भन्दा धेरै खेलाडी र अफिसियल नेपाल आउने भएका छन् ।

प्रतियोगितामा नेपाल सहित फिलिपिन्स, बहराइन, काजकिस्तान, अफगानिस्तान, उज्बेकिस्तान, पाकिस्तान, भारत, कतार, साउदी अरेबिया, जोर्डन, बंगलादेश, चाइनिज ताइपेइ, श्रीलंका, गुआम, इन्डोनेसिया र इरान रहेका छन्। पुरुष तर्फ फिलिपिन्स, बहराइन, काजकिस्तान, अफगानिस्तान, उज्बेकिस्तान, पाकिस्तान, भारत, कतार, नेपाल, साउदी अरेबिया, जोर्डन, बंगलादेश, चाइनिज ताइपेइ र श्रीलंकाकाे सहभागिता रहने छ। महिला तर्फ नेपाल, फिलिपिन्स, भारत, गुआम, श्रीलंका, इरान, उज्बेकिस्तान र इन्डोनेसियाबीच प्रतिस्पर्धा हुनेछ।

नेपालमा हुने एसिया रग्बी इमिरेट्स सेभेन्स ट्रफीलाई इमिरेट्सले मुख्य प्रायोजन गरेको छ । एसियाली रग्बीको यस वर्षको सबैभन्दा ठूलो यस प्रतियोगितासँग इमिरेट्सले मुख्य प्रायोजकमा सम्झौता गरेको हो । नेपालमा पहिलो पटक सिनियरतर्फ रग्बीको राष्ट्रिय टोलीको प्रतिस्पर्धा हुन लागेको हो। प्रतियोगिता लिग कम नकआउट प्रणालीमा खेलाइने छ।

यसअघि सन् २०२२ मा अन्डर १८  र सन् २०२३ मा अन्डर २० रग्बी दशरथ र‌ंगशालामा नै आयोजना गरिएको थियो ।