निजगढ । शुलभ जंग राणा नेपाली फुटबलमा क्रियाशील नाम हो । २०३७ सालमा पाल्पामा जन्मिएका राणाले २०६१ सालदेखि व्यवसायिक रुपमा फुटबल खेल्न थालेका हुन् ।
शहिद स्मारक सी डिभिजन लिगमा डेब्यु गर्दै व्यवसायीक फुटबल सुरु गरेका राणाको करिअर सुखद रह्यो । स्टार क्लब काठमाडौंबाट खेलेको पहिलो प्रतियोगितामै उत्कृष्ट प्रदर्शन गर्दै टोली लिग बिजेताको रुपमा बी डिभिजन लिगमा उक्लिन सफल भयो । जसमा राणाको प्रदर्शन उत्कृष्ट रह्यो ।
सोही प्रदर्शनको आधारमा उनलाई तत्कालिन ए डिभिजन क्लब रानी पोखरी कर्नर टिम आरसिटीले अनुबन्ध गर्यो । राणाले २०६४ देखि २०७० सम्म आरसिटीबाट नेपालको माथिल्लो डिभिजनको सर्वाधिक प्रतिष्ठित व्यवसायीक फुटबल प्रतियोगिता शहिद स्मारक ए डिभिजन लिग खेले । सो अवधिमा आरसिटीबाट उनले चितवनमा संचालित वि सं २०६५ को अमिला स्मृति राष्ट्रिय फुटबल प्रतियोगिता, धरानमा संचालित वि सं २०६७ को बुढासुब्बा गोल्डकप र वि सं २०६७ मा पोखरामा संचालित आदर्श कपको उपाधि जितेका छन् भने अन्य थुप्रै प्रतियोगिताहरुमा उत्कृष्ट प्रदर्शन गर्दै टोलीलाई अघि बढाउन भूमिका खेलेका थिए । उपाधिको अलावा उनले आरसिटीलाई वि सं २०६७ मा शहिद मजदुर कपको उपविजेता, वि सं २०६८ मा भारतको सिक्किममा संचालित गभर्नर्स गोल्डकप र धरानमा संचालित बुढासुब्बा गोल्डकपको उपविजेता, वि सं २०६९ मा एनसेल कपको उपविजेता र वि सं २०७० मा सिमरा गोल्डकपको उपविजेता बनाउन महत्वपूर्ण भूमिका खेलेका थिए ।
आरसिटीबाट व्यवसायीक फुटबल खेलेका राणाले २०७३ देखि सोहि क्लबमा सहायक प्रशिक्षकको रुपमा काम गरे । दुई वर्ष भन्दा बढी आरसिटीको सहायक प्रशिक्षकको रुपमा काम गरेका राणाले सो अवधिमा आरसिटीलाई बी डिभिजनको उपाधी जिताउन सफल भए । उनी सहायक प्रशिक्षक रहेको आरसिटीले तेस्रो स्थानमा रहदै २०७३ को बी डिभिजन लिग टुंग्याएको थियो भने २०७५ मा बी डिभिजन लिगको उपाधि जित्न सफल भएको थियो । राम्रो प्रशिक्षण कलाको कारण राणाले २०७६ मा आरसिटीको मुख्य प्रशिक्षकको जिम्मेवारी पाएका थिए । खेलाडी र प्रशिक्षक दुबैको भूमिकामा आरसिटीमा आबद्ध भएका राणाले नेपाली फुटबललाई राम्रोसँग बुझ्ने अवसर पाए ।
आरसिटीमा १ वर्ष प्रशिक्षण गराएका राणालाई २०७६ देखि २०७८ सम्म अखिल नेपाल फुटबल संघ एन्फाले मधेश प्रदेशको मुख्य प्रशिक्षकको जिम्मेवारी दिएको थियो । मधेश प्रदेशको मुख्य प्रशिक्षकको रुपमा काम गरे लगत्तै राणा मोफसलको बी डिभिजन फुटबल क्लब बिरगंज युनाईटेडमा २०७७ देखि आबद्ध भए । हाल बिरगंजका स्थायी बासिन्दा रहेका राणाले २०७९ सम्म बिरगंज युनाइटेडमा मुख्य प्रशिक्षकको रुपमा प्रशिक्षण गराए । सो अवधिमा बिरगंजलाई मोफसलमा संचालन हुने फुटबल प्रतियोगिताहरुमा बलियो फुटबल क्लबको रुपमा प्रस्तुत गराउन सफल भए । रणनैतिक रुपमा टोलीलाई अघि बढाउन सक्ने राणा एएफसी ए कोचीङ सर्टिफाईड लाईसेन्स प्राप्त प्रशिक्षक हुन । सन् २०१३ मा एएफसी सी कोचीङ सर्टिफाईड लाईसेन्स प्राप्त गरेका राणाले सन् २०१५ मा एएफसी बी कोचीङ सर्टिफाईड लाईसेन्स प्राप्त गरेका थिए भने सन् २०१७ मा एएफसी ए कोचीङ सर्टिफाईड लाईसेन्स प्राप्त गर्न सफल भएका थिए ।
यसका अलावा राणाले सन् २०२२ मा एएफसी फिटनेस कोचीङ सर्टिफिकेट कोर्स लेभल १ ए र रोयल नेदरल्याण्ड फुटबल एसोसियसनद्वारा आयोजित वर्ल्ड कोचेज कोर्स भाग १ पुरा गरेका छन् । शुलभ उनका दाइ बिशाल राणाबाट प्रेरित भएर फुटबल जगतमा लागेका हुन् । विशाल थ्री स्टार क्लब र नेपाल पुलिस क्लबबाट फुटबल खेल्ने गर्थे । बिशालले पछि बिरगंजमा फुटबल प्रशिक्षण गराउन थाले । पर्सा जिल्ला फुटबल संघको प्रशिक्षकको जिम्मेवारी पाएका राणा खेलाडी उत्पादन गर्न लागिपरेका थिए । नेपाली राष्ट्रिय फुटबल टोलीका पुर्व सदस्य अमर डङ्गोल बिशालको प्रशिक्षणबाट उत्पादित खेलाडी हुन । अमर सहित अन्य थुप्रै खेलाडी बिशालले उत्पादन गरेका थिए ।
बिशालको निधन भएपछि शुलभ बिशालकै पथमा अघि बढे । बिशालको उद्धेश्यलाई पूरा गर्न शुलभले पर्सा जिल्ला र आसपासका क्षेत्रहरुमा फुटबल प्रशिक्षण गराउन लागे । फुटबल प्रशिक्षणमा अब्बल राणा नेपाली फुटबलमा दक्ष रुपमा निखारिएका प्रशिक्षक हुन् । रानी पोखरी कर्नर टिम आरसिटी, मधेश प्रदेश र बिरगंज युनाईटेड क्लबलाई प्रशिक्षण गराएका राणा हाल बिरगंजस्थित दिल्ली पब्लिक स्कुलमा प्रशिक्षण गराउँछन् । मधेश प्रदेश फुटबल संघको मुख्य प्रशिक्षकको रुपमा कोभिड संक्रमणका कारण सम्पूर्ण फुटबल गतिविधि बन्देज भएको समयमा पनि गरेको उत्कृष्ट कामको प्रतिफल स्वरूप मधेश प्रदेशमा फुटबल गतिविधिलाई बढाउन सफल भएका थिए । अप्ठ्यारो समय परिस्थितिमा पनि आफ्नो टोलीलाई सफलता हासिल गराउन सक्ने क्षमता भएका राणा जस्ता पात्रनै नेपाली फुटबलको आधार हुन् ।
-1750047432.webp)
