मड्रिड (एएफपी) – विश्वमा यस्ता थोरै क्लब छन्, जसले बार्सिलोनाले जस्तै स्टार खेलाडी उत्पादन गरेको भन्दै गर्व गर्न सक्छन्। यो क्याटलान क्लबको एकेडेमीले को मात्रै दिएन छैन?
अर्जेन्टिनी स्टार लिओनल मेसीमात्रै होइन, कार्लोस पुयोल, जाभी हर्नान्डेज, आन्द्रेस इनिएस्टा, सर्जियो बुस्केट्स र जेरार्ड पिकेजस्ता विश्व फुटबलमा तहल्का नै मच्चाउने खेलाडी यही क्लबको देन हुन्। यसमा पछिल्लो समय अर्को नाम थपिएको छ, लामिन यमल। १७ वर्षीय स्पेनका युवा स्टारलाई धेरैले पहिलादेखि नै भनिँदै आइएको छ— यी पछिका मेसी हुन्।
यमल भन्छन्, ‘इतिहासकै उत्कृष्ट खेलाडीसँग तुलना गर्नु अविश्वसनीय कुरा हो। यसको अर्थ म राम्रो गरिरहेको छु भन्ने हो। तर, उहाँले आफ्नो करियरमा जे जति उपलब्धि हासिल गर्नुभयो त्यो गर्न निकै कठिन हुनेछ।’
मेसी १३ वर्षकै उमेरमा बार्सिलोनाको एकेडेमी भित्रिएका हुन्। उनले क्लब करियरमा जित्नुपर्ने सबै उपाधि यहीँबाट जितेका छन्। त्यसैले मेसीको सफलताको चर्चा जतिबेला चल्न सुरू हुन्छ त्यसमा बार्सिलोनाको नाम जोडिन्छ नै। त्यसैले त मेसी पनि यही क्लबबाट करियर अन्त्य होस् भन्ने चाहन्छे। उनी भन्थे, ‘बार्सिलोना मेरो घर हो। मलाई यही क्लबले जन्माएको हो। त्यसैले म करियरको अन्तिमसम्म पनि यहीबाट खेल्न चाहन्छु।’ अहिले यमल पनि ठ्याकै मेसीकै लाइनमा उभिएका छन्। भन्छन्, ‘बार्सिलोना कहिल्यै छाड्न नपरोस्।’
सन् २०२३ को अप्रिलमा १५ वर्षको उमेरमा यमलले बार्सिलोनामा डेब्यु गरेका थिए। डेब्यु गरेयता नै क्लबका लागि उनी महत्त्वपूर्ण खेलाडी बनेका छन्। स्पेनिस निजी टेलिभिजन एन्टेना ३ को हिट शो ‘एल होर्मिगुएरो’ मा उनले भने, ‘म कहिल्यै बार्सिलोना छोड्दिनँ। बार्सिलोनाको म लिजेन्ड बन्न चाहन्छु।’ किन त? यमलको आफ्नै तर्क छ— सानो उमेरदेखि नै बार्सिलोनाले उत्कृष्ट खेलाडी बनाउन मनोवैज्ञानिक रूपमा तयार पारेको छ।
उनी आफैँलाई पनि सानैदेखि बार्सिलोनाले यसरी नै तयार भएका हुन्। त्यसैले उनी आफू बार्सिलोनाको उत्कृष्ट उत्पादन रहेको प्रमाणित गर्न चाहन्छन्।
‘सानो उमेरदेखि बार्साले खेलाडीलाई उत्कृष्ट बनाउन मनोवैज्ञानिकको रूपमा तयार पार्छ। मलाई पनि सानैदेखि तयार पार्दै आएका छन्। त्यसैले म पनि आफू उत्कृष्ट बन्ने कोसिस गर्छु र आफूलाई भविष्यमा बार्सिलोनाको लिजेन्डको रूपमा चिनोस् भन्ने चाहन्छु,’ उनले भने।
जुलाईमा १७ वर्ष पुगेका विंगरले जति क्लबका लागि महत्त्वपूर्ण योगदान दिएका छन् त्यति नै राष्ट्रिय टोलीका लागि पनि दिँदै आएका छन्। स्पेनले युरो कप २०२४ मा कीर्तिमानी चौथोपल्ट उपाधि जित्दा यी नै यमल प्रतियोगिताको इतिहासमा खेल्ने र गोल गर्ने सबैभन्दा कान्छो फुटबलर बनेका थिए। फ्रान्सविरुद्धको सेमिफाइनलमा शानदार गोलसहित युरो कपभर उनले गरेको उत्कृष्ट प्रदर्शनको जति प्रशंसा गरेपनि कम हुँदैन।
-1751297393.jpeg)
-1751282483.jpeg)
-1751282194.jpeg)
