काठमाडौं। अस्ट्रेलियाका तीव्र गतिका बलर प्याट कमिन्सले आइसिसी ट्वान्टी– २० विश्वकपमा लगातार ह्याट्रिक विकेट लिएका छन्।
सुपर एटअन्तर्गत अफगानिस्तानविरुद्ध जारी खेलमा उनले ह्याट्रिक विकेट लिएका हुन्। यसअघि उनले बंगलादेशविरुद्ध पहिलोपल्ट ह्याट्रिक विकेट लिएका थिए।
१८औं ओभरको अन्तिम बलमा राशिद खानलाई उनले डेभिड वार्नरबाट क्याच आउट गराएका थिए। २०औं ओभरको पहिलो बलमा करिम जनत र दोस्रो बलमा गुलबदीन नइबको विकेट लिँदै कमिन्सले ह्याट्रिक पूरा गरे। चार ओभर बलिङ गरेका उनले २८ रन खर्चिए।
योसँगै कमिन्स ट्वान्टी–२० विश्वकपमा लगातार दोस्रोपटक ह्याट्रिक विकेट लिने पहिलो खेलाडी बनेका छन्। बंगलादेशविरुद्ध उनले १८औं ओभरको पाँचौं बलमा महमुदउल्लाह र छैटौं बलमा महेदी हसनको विकेट लिएका थिए।
२०औं ओभरको पहिलो बलमा मोहम्मद तौहीद हृदोयको विकेट लिँदै ह्याट्रिक पूरा गरेका थिए। चार ओभर बलिङ गरेका उनले २९ रन खर्चिएका थिए।
