काठमाडौं। वेस्ट इन्डिजले आइसिसी ट्वान्टी-२० सुपर एटमा पहिलो जित हासिल गरेको छ।
शनिबार बिहान सम्पन्न खेलमा अमेरिकालाई नौ विकेटले पराजित गर्दै वेस्ट इन्डिजले दुई अंक जोडेको हो। वेस्ट इन्डिज पहिलो खेलमा इङ्ल्यान्डसँग आठ विकेटले पराजित भएको थियो।
अमेरिकाको भने यो लगातार दोस्रो हार हो। यसअघि अमेरिका दक्षिण अफ्रिकासँग १८ रनले पराजित भएको थियो। योसँगै अमेरिका प्रतियोगिताबाट बाहिरिएको छ। अमेरिकाले अन्तिम खेल इङ्ल्यान्डसँग खेल्ने छ।
अमेरिकाले दिएको १२८ रनको लक्ष्य पछ्याएको वेस्ट इन्डिजले १०.५ ओभरमा एक विकेट गुमाउँदै १३० रन बनायो।
वेस्ट इन्डिजका ओपनर साई होपले अविजित रहँदै सर्वाधिक ८२ रन बनाए। ३९ बल खेलेका उनले चार चौका र आठ छक्का प्रहार गरे।
जोनसन चार्ल्स १५ रनमा आउट हुँदा निकोलस पूरन २७ रनमा अविजित रहे। अमेरिकाका हरमीत सिंहले एक विकेट लिए।
त्यसअघि टस हारेर पहिला ब्याटिङ थालेको अमेरिकाले १९.५ ओभरमा सबै विकेट गुमाउँदै १२८ रन बनाएको थियो।
अमेरिकाका ओपनर एन्ड्रियस गौसले सर्वाधिक २९ रन बनाए। नीतिश कुमार २०, मिलिन्द कुमार १९, शैडली भान शाल्विक १८ र कप्तान आरोन जोन्स ११ रनमा आउट हुँदा अली खान १४ रनमा अविजित रहे।
वेस्ट इन्डिजका रोस्टन चेजले सर्वाधिक तीन विकेट लिए। अल्जरी जोसेफले दुई र गुडाकेश मोटीको नाममा एक विकेट रह्यो।
