उपाधि विजेता बास्केटबल टोली सम्मानित

काठमाडौँ। नेपाल बास्केटबल संघले बोर्डर सिङफु भिलेज स्पोर्ट्स कार्निभलअन्तर्गत पुरुष थ्री बाइ थ्री बास्केटबलको उपाधि विजेता नेपाली पुरुष टोलीलाई बिहीबार नगदसहित सम्मान गरेको छ।

चीनको युनानमा बैशाख १२ देखि १८ गतेसम्म भएको प्रतियोगितामा सहभागी ४ खेलाडी र १ प्रशिक्षकसहित ५ जना सम्मानित भएका हुन्।

सम्मानित हुने खेलाडीमा विजय बुर्जा (कप्तान), निकेश मगर, मनीष केसी र निश्चल महर्जन रहेका छन्। प्रशिक्षकमा सुशील गुरुङ छन्।

खेलाडी र प्रशिक्षकलाई जनही ३० हजार नगदसहित प्रशंसा पत्र प्रदान गरियो। उनीहरूलाई नेपाल बास्केटबल संघका अध्यक्ष भीमसिंह गुरुङलगायतले एक कार्यक्रमबीच सम्मान गरे।

प्रतियोगितामा नेपाल अपराजित रहँदै उपाधि जित्न सफल भएको थियो। नेपालले फाइनलमा युनान प्रदेशको ब्याड ५ टोलीलाई २०–१९ ले पराजित गर्दै इतिहास रचेको थियो। नेपाल बास्केटबल संघका महासचिव नरेन्द्र थापाका अनुसार नेपाली बास्केटबलको इतिहासमै कुनै पनि टोलीले स्वर्ण जितेको यो पहिलो अवसर हो।

प्रतियोगितामा नेपालसहित ७ राष्ट्र तथा चीनका ३२ गरी ३९ टोली सहभागी थिए। नेपालसहित चीनका ४ गरी ५ टिम समूह ‘एफ’ मा थिए। समूह चरणको सबै खेल जितेको नेपाल विजेता हुँदै प्रिक्वार्टरफाइनलमा पुगेको थियो। नेपालले प्रिक्वार्टरफाइनलमा भियतनाम, क्वार्टरफाइनलमा डिफेन्डिङ च्याम्पियन होङही र सेमिफाइनलमा थाइल्यान्डलाई हराउँदै फाइनलमा स्थान सुरक्षित गरेको थियो। प्रतियोगितामा नेपालका मनीष ‘मोस्ट भेलुएबल प्लेयर’ तथा सुशील उत्कृष्ट प्रशिक्षक घोषित भएका थिए।