कीर्तिमानसहित ट्रफी उचाल्ने मनाङको लक्ष्य

काठमाडौं । पल्सर सहिद स्मारक 'ए' डिभिजन लिग फुटबलको अन्तिम दिन आज (मंगलबार) दुई खेलहरु संचालन हुँदैछ ।

एन्फा कम्प्लेक्स सातदोबाटोमा च्याम्पियन सिग्नेचर मनाङ मर्स्याङ्दी क्लब र फ्रेन्ड्स क्लबबीच प्रतिस्पर्धा हुनेछ । यस्तै हल्चोकको एपीएफ मैदानमा एनआरटी र ब्रिगेड ब्वाइजबीच खेल हुनेछ । दुवै खेल अपरान्ह २ बजे सुरु हुनेछ ।

तुलनात्मक कमजोर टिम फ्रेन्ड्सविरुद्ध मैदान उत्रदा मनाङ कीर्तिमानसहित ट्रफी उचाल्ने लक्ष्यमा हुनेछ । रेलिगेसन बिनाको लिगमा मनाङले दुई खेल अगावै उपाधि उचालेको थियो ।  तर, मनाङ अन्तिम खेलमा फ्रेन्ड्सलाई हराएर कीर्तिमान बनाएर उपाधि उचाल्न चाहन्छ ।

फ्रेन्ड्सलाई पराजित गरे मनाङले लिगको सबै १३ खेल जितेर लिगको उपाधि उचाल्ने क्लबको कीर्तिमान बनाउनेछ । लिगको १२ औं चरण सकिदा मनाङले ३६ अंक जोडेको छ । अहिलेसम्म हार र बराबरीको स्वाद नपाएको मनाङले फ्रेन्ड्सलाई हराए उसको ३९ अंक हुनेछ । 

यता, फ्रेन्ड्स भने मनाङविरुद्ध अप्रत्यासित नतिजा निकाल्ने लक्ष्यमा हुनेछ ।  मनाङलाई हराएर फ्रेन्ड्स ऋण अंकबाट मुक्त हुन चाहन्छ ।  लिगको पुछारबाट तेस्रो स्थानमा रहेको फ्रेन्ड्सको ९ अंक छ । ऋण अंकबाट मुक्त हुन फ्रेन्ड्सलाई कम्तिमा बराबरी अथवा कम गोल अन्तरको हार आवश्यकता रहेको छ ।  

यस्तै हल्चोकमा हुने अर्को खेलमा पुछारको एनआरटीले ब्रिगेडसंग खेल्दैछ । ब्रिगेडविरुद्ध मैदान उत्रदा एनआरटी ऋण अंकबाट बच्न संघर्ष गर्नेछ  ।

६ अंक जोडेर पुछारमा रहेको एनआरटी ब्रिगेडलाई हराएर रेलिगेसन जोनबाट बाहिर निस्कन चाहन्छ  । तर, एनआरटीलाई रेलिगेसनबाट माथि निस्कन फराकिलो जित आवश्यक रहेको छ  ।

यता, लिगको ११ औं स्थानको ब्रिगेड पनि एनआरटीलाई हराएर आफुलाई ऋण अंक पाउनबाट मुक्त हुन चाहन्छ  ।