रंगशाला दुर्घटनाको सम्झनामा स्मृति सभा

काठमाडौं । करिब ३५ वर्षअघि फागुन २९ गते दशरथ रंगशालामा भएको दुर्घंटनाको सम्झनामा मंगलबार स्मृति सभाको आयोजना गरिएको छ । 

स्पेनिस क्लब रियल मड्रिड फ्यान क्लब नेपालले फुटबलसँग सम्बन्धित फ्यान क्लबसँग सहकार्य गरि रंगशाला दुर्घटनाको सम्झनामा स्मृति सभाको आयोजना गरेको हो ।

बिक्रम सम्वत २०४४ साल फागुन २९ गते दशरथ रंगशालामा खेल चलिरहेको समय हावाहुरीका कारण भागदौड मच्चिएको थियो । हावा हुरी सहित परेको मुसलधारे पानी र असिना पानीपछि भागदौड मच्चिदा करिब ९३ जनाले ज्यान गुमाएका थिए । रंगशालाको ढोकाहरु बन्द गरिएका कारण भीड भाग्न खोज्दा सो दुर्घटनामा भएको मानिन्छ । 

त्रिभुवन च्यालेन्ज सिल्डको फाइनलमा भरिभराउ दर्शक रहेको रंगशालामा सो दुर्घटना भएको थियो । सोही दुर्घटनामा परेका समर्थकको सम्झनामा फुटबलका फ्यानहरुले हरेक वर्ष जसो दशरथ रंगशालामा स्मृति सभाको आयोजना गर्दै आएका छन् । 

गार्खाली रेड्स सपोटर्स क्लब र बार्सा नेपालसँग सहकार्य गरेर रियल मड्रिड फ्यान क्लबले त्रिपुरेश्वरस्थित दशरथ रंगशालामा मंगलबार साँझ स्मृति सभाको आयोजना गर्यो । 

स्मृति कार्यक्रममा पूर्व राष्ट्रिय फुटबल खेलाडी बिक्रम लामा, विराज महर्जन, बिशाल श्रेष्ठ सहित फुटबल समर्थकहरु उपस्थित थिए । सहभागीले मैनवत्ती बालेर मौन धारण गरि दुर्घटनामा ज्यान गुमाएका मृतक आत्माको चिर शान्तिको कामना गरेका थिए ।