फिफ्टिन्स रग्वी : आर्मीले पुलिसलाई हरायो

काठमाडौं । त्रिभुवन आर्मी क्लब काठमाडौंमा जारी फिफ्टिन्स रग्वी च्याम्पियनसिपको दोस्रो स्थानमा उक्लिएको छ ।

बुधबार विभागीय डर्बीमा नेपाल पुलिस क्लबलाई हराउँदै आर्मी लिग तालिकाको दोस्रो स्थानमा उक्लिएको हो । 

दोस्रो खेलमा सुधारिएको प्रर्दशन गरेको आर्मीले पुलिसमाथि ५३–७ स्कोरको जित निकाल्यो । 

पहिलो खेलमा एपीएफसँग पराजित बनेको आर्मीलाई खेलमा फर्कन जितको आवश्यकता थियो । सोही अनुसारको प्रभावशाली जित पुलिसविरुद्ध आर्मीले निकाल्न सफल रह्यो । 

जित सहित आर्मीले ४ अंक जोडेको छ । समान अंक भएपनि स्कोरका आधारमा आर्मी दोस्रो स्थानमा उक्लिएको हो । पुलिस २ अंक जोडेर तालिकाको चौथौं स्थानमा यथावत छ । 

लिगको दोस्रो चरणको बुधबार भएको पहिलो खेलमा गोर्खाली रग्वी क्लबले एपीएफ क्लबलाई पराजित गर्यो ।

एपीएफलाई ४९–२० को स्कोरमा हराउँदै गोर्खाली रग्वी उपाधि नजिक पुगेको छ । गोर्खाली ६ अंक जोड्दै तालिकाको शीर्ष स्थानमा उक्लिदा एपीएफ ४ अंक सहित तेस्रो स्थानमा धकेलिएको छ ।